അഖിലേന്ത്യാ വ്യക്തിനിയമ ബോര്‍ഡും ജംഇയ്യത്തുല്‍ ഉലമാ ഹിന്ദുമാണ് ഹരജിക്കാര്‍

ന്യൂഡല്‍ഹി: പൊതുനിയമങ്ങള്‍ ഏകീകരിക്കുന്നതുസംബന്ധിച്ച മുത്വലാഖ് നിരോധനം, ബഹുഭാര്യത്വം തുടങ്ങിയ കേസുകള്‍ സുപ്രിംകോടതി നാളെ പരിഗണിക്കും. ചീഫ് ജസ്റ്റിസ് ടി.എസ് താക്കൂര്‍ അധ്യക്ഷനായ ബെഞ്ചിന്റെ പരിഗണനയിലുള്ള കേസില്‍ അന്തിമവിധി വരുന്നതിനു പക്ഷേ സമയം എടുക്കും. ചീഫ് ജസ്റ്റിസ് അധ്യക്ഷനായ ഏഴംഗബെഞ്ചിന് അതേദിവസം ഭരണഘടന സംബന്ധിച്ച വേറെ കേസും പരിഗണിക്കാനുണ്ട്.
മുത്വലാഖ് കേസ് പരിഗണിക്കുന്ന ബെഞ്ചിന്റെ അധ്യക്ഷനും ചീഫ് ജസ്റ്റിസ് ആണ്. അതിനാല്‍ ഇന്നു കേസ് നീട്ടിവയ്ക്കാനാണ് സാധ്യത. സംസ്ഥാനങ്ങളുടെ പ്രവേശനനികുതി സംബന്ധിച്ച ഭരണഘടനാകേസുകള്‍ പരിഗണിക്കുന്ന ഒമ്പതംഗ ബെഞ്ചിന്റെ തലവനും ചീഫ് ജസ്റ്റിസാണ്.
ഈ കേസ് പലകാരണങ്ങളാല്‍ നീട്ടിവയ്ക്കപ്പെട്ടിരുന്നു. ഇതിനു പിന്നാലെ നിരവധി അവധിദിവസങ്ങളും വരാനുണ്ട്. ഈ മാസം 29 മുതല്‍ നവംബര്‍ നാലുവരെ ദീപാവലിയുടെ അവധിയാണ്.
ഡിസംബറില്‍ ക്രിസ്തുമസ് അവധിയും പുതുവര്‍ഷ അവധിയും വരാനുണ്ട്. പുതുവര്‍ഷ അവധി കഴിഞ്ഞു കോടതി ജനുവരി മൂന്നിനു തുറക്കും. അതിനടുത്ത ദിവസം നാലിന് ചീഫ് ജസ്റ്റിസ് വിരമിക്കും. ഇതോടെ കേസ് മറ്റൊരു ബെഞ്ച് മുമ്പാകെയെത്തും.
മുത്വലാഖ് നിരോധനം, ബഹുഭാര്യത്വം, ഏകസിവില്‍കോഡ് എന്നീ വിഷയങ്ങളുമായി ബന്ധപ്പെട്ട് സുപ്രിംകോടതി സ്വമേധയാ എടുത്ത കേസടക്കം നിരവധി ഹരജികളാണ് നിലവിലുള്ളത്. അഖിലേന്ത്യാ വ്യക്തിനിയമ ബോര്‍ഡും ജംഇയ്യത്തുല്‍ ഉലമാ ഹിന്ദും കേസിലെ ഹരജിക്കാരാണ്.
കഴിഞ്ഞമാസം അഞ്ചിന് ഈ ഹരജികള്‍ പരിഗണിച്ച സുപ്രിംകോടതി, വിഷയത്തില്‍ നിലപാട് അറിയിക്കാന്‍ കേന്ദ്രസര്‍ക്കാരിനോട് നിര്‍ദേശിച്ചിരുന്നു. തുടര്‍ന്നു മുത്വലാഖ് , ബഹുഭാര്യത്വം എന്നീ ആചാരങ്ങള്‍ ഒരുമതേതരരാജ്യത്ത് ഉണ്ടാവാന്‍ പാടില്ലാത്തതാണെന്നും അതിനോടു യോജിക്കാനാവില്ലെന്നും അറിയിച്ചു കേന്ദ്രസര്‍ക്കാര്‍ കഴിഞ്ഞയാഴ്ചയാണ് കോടതിയില്‍ സത്യവാങ്മൂലം നല്‍കിയത്.