നെടുമ്പാശ്ശേരി: ചെറിയ വാപ്പാലശ്ശേരി ഇളംമേക്കാട് അരീക്കല്‍ വറിയത് മാത്തു ക്കുട്ടിയുടെ വീട്ടിലെ ആടുകള്‍ക്ക് നേരെയാണ് ആറോളം വരുന്ന തെരുവുനായ്ക്കളുടെ ആക്രമണം ഉണ്ടായത്.
കൂട്ടിന് സമീപം കെട്ടിയിട്ടിരുന്ന ഒരാടിനെ നായ്ക്കള്‍ കടിച്ചുകീറി കൊന്നു. മറ്റ് ആടുകള്‍ പേടിച്ചരണ്ട് ഭക്ഷണം കഴിക്കാത്ത അവസ്ഥയാണ്. വെളുപ്പിന് ആടുകളുടെ കരച്ചില്‍ കേട്ട് ഉണര്‍ന്ന വീട്ടുകാര്‍ കല്ലെറിഞ്ഞാണ് നായ്ക്കൂട്ടത്തെ തുരത്തിയത്.
ഹൃദ്രോഗത്തിന് വര്‍ഷങ്ങളായി ചികിത്സതേടുന്ന മാത്തുക്കുട്ടി ഒരു വര്‍ഷം മുമ്പാണ് വായ്പ്പയെടുത്ത് രണ്ട് ആടുകളെ വാങ്ങിയത്. ആടുവളര്‍ത്തലില്‍നിന്ന് ലഭിക്കുന്ന തുച്ഛമായ വരുമാനംകൊണ്ടാണ് മാത്തുക്കുട്ടിയുടെ ചികിത്സയടക്കമുള്ള കുടുംബ ചിലവ് കഴിഞ്ഞുവന്നത്. ചുറ്റുമതിലില്ലാത്ത വീട്ടില്‍ ഇതിന് മുമ്പ് പലപ്പോഴും നായ്ക്കളുടെ ശല്യം ഉണ്ടായിട്ടുള്ളതായും തെരുവുനായ്ക്കളെ ഭയന്ന് പകല്‍പോലും വീടിന് പുറത്തിറങ്ങുവാന്‍പോലും ഭയമാണെന്ന് വീട്ടുകാര്‍ പറഞ്ഞു.
തെരുവുനായ്ക്കളുടെ ശല്യത്തില്‍നിന്ന് മോചനം ആവശ്യപ്പെട്ട് തെരുവുനായ് ഉന്മൂലനം സംഘം ചെയര്‍മാന്‍ ജോസ് മാവേലിയെ നാട്ടുകാര്‍ വിവരമറിയച്ചതനുസരിച്ച് അദ്ദേഹം മാത്തുക്കുട്ടിയുടെ വീട്ടിലെത്തി കാര്യങ്ങള്‍ മനസ്സിലാക്കി.
ആടുവളര്‍ത്തലിലൂടെ ഉപജീവനം കഴിഞ്ഞിരുന്ന നിര്‍ധന കുടുംബത്തിന് നഷ്ടപരിഹാരം ലഭിക്കുന്നതിനായി മനുഷ്യാവകാശ കമ്മീഷന്‍ മുമ്പാകെ പരാതി സമര്‍പ്പിക്കുമെന്ന് ജോസ് മാവേലി പറഞ്ഞു.തെരുവുനായ്ക്കളുടെ വിളയാട്ടം മൂലം ആടുവളര്‍ത്തലും കോഴിവളര്‍ത്തലുമായി കഴിയുന്ന പാവപ്പെട്ട ജനങ്ങള്‍ക്ക് ജീവിക്കാന്‍ കഴിയാത്ത സ്ഥിതിവിശേഷമാണ് ഇപ്പോഴുള്ളതെന്നും പട്ടികളെ ഭയന്ന് സ്‌കൂള്‍ വിദ്യാര്‍ത്ഥികള്‍ക്ക് വഴിനടക്കുവാന്‍പോലും സാധിക്കുന്നില്ലെന്നും തെരുവുനായ്ക്കളുടെ ശല്യത്തിന് പരിഹാരം കാണേണ്ട ഭരണകര്‍ത്താക്കളും നിയമപാലകരും മൗനം പാലിക്കുകയാണെന്നും അക്രമകാരികളായ തെരുവുനായ്ക്കളെ കൊല്ലുന്നതിന് തടസ്സമില്ലെന്ന ഹൈക്കോടതി വിധി ഉണ്ടായിട്ടുപോലും തെരുവുനായ്ക്കള്‍ക്കെതിരെ നടപടിയെടുക്കാന്‍ അധികാരികള്‍ ആരും തന്നെ മുന്നോട്ടുവരാത്ത സാഹചര്യം വളരെ ദയനീയമാണെന്നും ജോസ് മാവേലി പറഞ്ഞു.