കൊച്ചി:  2017ലെ അണ്ടര്‍17 ലോകകപ്പ് ഫുട്‌ബോളിന്റെ ആദ്യ വേദിയായി ഔദ്യോഗികമായി ഫിഫ  പ്രഖ്യാപിച്ച കൊച്ചിക്ക് മറ്റൊരു സൗഭാഗ്യം കൂടി. ലോകകപ്പിന്റെ ഭാഗ്യമുദ്രയുടെ പ്രകാശനം  നവംബര്‍ 14ന് ശിശുദിനത്തില്‍ കൊച്ചിയില്‍ നടക്കുമെന്ന്്്  ടൂര്‍ണമെന്റ് ഡയറക്ടര്‍  ഹാവിയര്‍ സെപ്പിയുടെ നേതൃത്വത്തിലുള്ള ഫിഫ സംഘം അറിയിച്ചു.

ആദ്യമായി  ഇന്ത്യ ആഥിയേത്വം വഹിക്കുന്ന ഫിഫ ലോകകപ്പ് മത്സരത്തിന്റെ മുഴുവന്‍  ഗാംഭീര്യവും പ്രകടമാക്കുന്ന രീതിയില്‍ വിപുലമായ പരിപാടികളാണ്  ഫിഫ ആഗ്രഹിക്കുന്നതെന്നും ഇക്കാര്യത്തില്‍ പ്രാദേശിക സംഘാടകരുടെയും  സര്‍ക്കാരിന്റെയും പൂര്‍ണ പിന്തുണയുണ്ടാകണമെന്നും ഫിഫ പ്രതിനിധി സംഘം  അറിയിച്ചു.

എറണാകുളം അംബേദ്കര്‍ സ്റ്റേഡിയമാണ് ചടങ്ങിനായി പരിഗണിക്കുന്നതെന്ന് അണ്ടര്‍17  ലോകകപ്പ് നോഡല്‍ ഓഫിസറും സംസ്ഥാന കായിക വകുപ്പ് സെക്രട്ടറിയുമായ എ.പി.എം മുഹമ്മദ്  ഹനീഷും  കെ.എഫ്.എ പ്രസിഡന്റ് കെ.എം.ഐ മേത്തറും വ്യക്തമാക്കി. ലോക ശ്രദ്ധ നേടുന്ന  തരത്തിലുള്ള ചടങ്ങുകളായിരിക്കും ഭാഗ്യമുദ്രയുടെ പ്രകാശനത്തോടനുബന്ധിച്ച് നടത്തുകയെന്ന് ഫിഫ സംഘം വ്യക്താക്കി. ചാംപ്യന്‍ഷിപ്പിന്റെ ലോഗോ കഴിഞ്ഞ മാസം ഗോവയില്‍ നടന്ന ചടങ്ങില്‍ പുറത്തിറക്കിയിരുന്നു.  സ്റ്റേഡിയം നവീകരണം  സാധ്യമാകാതിരുന്നതിനാലാണ് ബംഗളൂരു  സാധ്യതാപട്ടികയില്‍ നിന്ന്  പുറത്തുപോയതെന്നും മറ്റ് വേദികളുടെ പരിശോധന 25 നകം  പൂര്‍ത്തിയാക്കുമെന്നും അദ്ദേഹം പറഞ്ഞു.
കൊച്ചിയെ ലോകകപ്പ് വേദിയാക്കി  കൊണ്ടുള്ള ഫിഫയുടെ ലോഗോ ടൂര്‍ണമെന്റ് ഡയറക്ടര്‍ ഹാവിയര്‍ സെപ്പി  കായികവകുപ്പ്‌സെക്രട്ടറി മുഹമ്മദ് ഹനീഷിന് കൈമാറികൊണ്ടാണ്  ഔദ്യോഗികപ്രഖ്യാപനം നിര്‍വഹിച്ചത്.