ഭുവനേശ്വര്‍: കേരളവും ഹൈദരാബാദും തമ്മിലുള്ള രഞ്ജി പോരാട്ടം സമനിലയില്‍. ആദ്യ ഇന്നിങ്‌സില്‍ ഒന്‍പതു വിക്കറ്റിനു 517 റണ്‍സെടുത്ത് ഡിക്ലയര്‍ ചെയ്ത കേരളത്തിനെതിരേ ഹൈദരാബാദ് ആദ്യ ഇന്നിങ്‌സില്‍ 281 റണ്‍സില്‍ പുറത്തായി ഫോളോ ഓണ്‍ ചെയ്തു. രണ്ടാമിന്നിങ്‌സില്‍ ഹൈദരാബാദ് മൂന്നു വിക്കറ്റിനു 220 റണ്‍സെന്ന നിലയില്‍ നില്‍ക്കെ മത്സരം സമനിലയില്‍ പിരിയുകയായിരുന്നു.
 ഏഴു വിക്കറ്റ് നഷ്ടത്തില്‍ 231 റണ്‍സെന്ന നിലയില്‍ മൂന്നാം ദിനം പിരിഞ്ഞ ഹൈദരാബാദിന്റെ ശേഷിച്ച മൂന്നു വിക്കറ്റുകള്‍ നാലാം ദിനം ക്ഷണത്തില്‍ വീഴ്ത്തി അവരെ ഫോളോ ഓണിനു വിടാമെന്ന കേരളത്തിന്റെ തന്ത്രം ഫലം കണ്ടു. എന്നാല്‍ രണ്ടാമിന്നിങ്‌സ് തുടങ്ങിയ ഹൈദരാബാദ് ശ്രദ്ധയോടെ ബാറ്റു വീശിയതോടെ അവരെ പെട്ടെന്ന് പുറത്താക്കി വിജയം പിടിക്കാമെന്ന കേരളത്തിന്റെ കണക്കുകൂട്ടലുകള്‍ തെറ്റി. 120 റണ്‍സെടുത്ത് പുറത്താകാതെ നിന്ന അനിരുദ്ധിന്റെ ബാറ്റിങാണ് ഹൈദരാബാദിനു തുണയായത്. ബദരീനാഥ് 39 റണ്‍സെടുത്ത് പിന്തുണച്ചു.
നേരത്തെ കേരളത്തിനായി സന്ദീപ് വാര്യര്‍, മോനിഷ് എന്നിവര്‍ മൂന്നു വിക്കറ്റും ജലജ് സക്‌സേന രണ്ടു വിക്കറ്റും ഇഖ്ബാല്‍ അബ്ദുല്ല, ബേസില്‍ തമ്പി എന്നിവര്‍ ഓരോ വിക്കറ്റും വീഴ്ത്തിയിരുന്നു. ആദ്യ ഇന്നിങ്‌സില്‍ സെഞ്ച്വറി നേടി കേരളത്തിനു കൂറ്റന്‍ സ്‌കോര്‍ സമ്മാനിച്ച ഇഖ്ബാല്‍ അബ്ദുല്ലയാണ് കളിയിലെ കേമന്‍.
ആദ്യ ഇന്നിങ്‌സിലെ ലീഡിന്റെ ബലത്തില്‍ കേരളത്തിനു സമനിലയില്‍ നിന്നു മൂന്നു പോയിന്റ് ലഭിച്ചു. മൂന്നു മത്സരങ്ങളില്‍ നിന്നു കേരളത്തിന്റെ രണ്ടാം സമനിലയാണിത്. ഒരു മത്സരത്തില്‍ പരാജയപ്പെട്ടിരുന്നു.
ആറു പോയിന്റുള്ള കേരളം എട്ടാം സ്ഥാനത്താണ്. ഈ മാസം 27 മുതല്‍ ചത്തീസ്ഗഢിനെതിരേ റാഞ്ചിയിലാണ് കേരളത്തിന്റെ നാലാം മത്സരം.