വടകര: കരിമ്പനപാലത്തെ ഉപയോഗശൂന്യമായ പെട്രോള്‍ബങ്ക് അശ്രദ്ധമായി മാറ്റാന്‍ ശ്രമിച്ചത് നാട്ടുകാര്‍ എതിര്‍ത്തതിനാല്‍ വലിയ അപകടം ഒഴിവായി.
വര്‍ഷങ്ങള്‍ക്കുമുന്‍പ് പ്രവര്‍ത്തനം നിലച്ച പെട്രോള്‍ ബങ്കിലെ ടാങ്കുകളാണ് ഇന്നലെ രാവിലെയോടെ കുഴിച്ച് മാറ്റാന്‍ ആരംഭിച്ചത്.
എന്നാല്‍ ഈ ടാങ്കുകളില്‍ പെട്രോളും ഡീസലും ഉണ്ടായിരുന്നു. പെട്രോളിന്റെ ടാങ്ക് തൊഴിലാളികള്‍ തുറന്നതോടെ പരിസരങ്ങളില്‍ ഗന്ധം പരന്നു.
ഉടന്‍ നാട്ടുകാര്‍ സംഘടിച്ച് പൊലിസിലും ഫയര്‍ഫോഴ്‌സിലും വിവരമറിയിക്കുകയായിരുന്നു.
 അപ്പോഴേക്കും കുഴിയിലേക്ക് പെട്രോള്‍ പടര്‍ന്നിരുന്നു. അശ്രദ്ധമായാണ് ഇത് കൈകാര്യം ചെയ്തതെന്നും ചെറിയൊരു പിഴവ് വന്‍സ്‌ഫോടനത്തിനും ദുരന്തത്തിനും കാരണമാകുമായിരുന്നുവെന്നും ഫയര്‍ഫോഴ്‌സ് അധികൃതര്‍ പറഞ്ഞു.
വടകര എസ്.ഐ രാമകൃഷ്ണന്റെ നേതൃത്വത്തില്‍ പൊലീസും സ്ഥലത്തെത്തിയിരുന്നു.
തുടര്‍ന്ന് ഫയര്‍ഫോഴ്‌സിന്റെ നേതൃത്വത്തില്‍ പെട്രോള്‍ പൂര്‍ണമായും ഒഴിവാക്കി ടാങ്കുകള്‍ മാറ്റി.
ദേശീയപാതയോട് ചേര്‍ന്നുള്ള ഇവിടെ വലിയൊരു ദുരന്തം തലനാരിഴയ്ക്ക് ഒഴിവായതിന്റെ ആശ്വാസത്തിലാണ് നാട്ടുകാര്‍.