തിരുവനന്തപുരം: ഏകീകൃത സിവില്‍കോഡ് സംബന്ധിച്ച് ആശങ്കയുള്ളവരുമായി അഭിപ്രായ സമന്വയം വേണമെന്ന് കോണ്‍ഗ്രസ് പ്രവര്‍ത്തക സമിതി അംഗം എ.കെ. ആന്റണി.
പ്രധാനമന്ത്രിയും ബി.ജെ.പി അധ്യക്ഷനും മുത്വലാഖിനെ കുറിച്ച് പറയുമ്പോള്‍ ആശങ്ക വര്‍ധിക്കുന്നു. വ്യത്യസ്ത അഭിപ്രായം ഉള്ളവരുമായി ചര്‍ച്ചനടത്തി ആദ്യം ധാരണയിലെത്തണമെന്നും അദ്ദേഹം മാധ്യമ പ്രവര്‍ത്തകരോടു പറഞ്ഞു.
സംസ്ഥാനത്തെ സിവില്‍സര്‍വിസ് ഉദ്യോഗസ്ഥര്‍ക്കിടയില്‍ ചേരിതിരവ് രൂക്ഷമാണ്. അത് വേഗത്തില്‍ പരിഹരിച്ചില്ലെങ്കില്‍ ഭരണസ്തംഭനം ഉണ്ടാകും. കേരളത്തില്‍ വര്‍ഗീയ ധ്രുവീകരണത്തിന് ശ്രമം നടക്കുന്നുണ്ട്. അക്രമം നടത്തുന്നത് ഏത് കൊലകൊമ്പനായാലും നിയമനടപടി സ്വീകരിക്കണം. സി.പി.എമ്മിനും, ബി.ജെ.പിക്കും ധിക്കാരവും അധികാര ഗര്‍വുമാണ്. പാര്‍ട്ടിവളര്‍ത്താന്‍ രക്തം വേണ്ടെന്ന് ഇരു പാര്‍ട്ടികളുടേയും ഭരണ നേതൃത്വം തീരുമാനിക്കണം. രക്തസാക്ഷികളെ സൃഷ്ടിക്കുന്നത് ഇരു പാര്‍ട്ടികളുടേയും ബഹുജന അടിത്തറ വളര്‍ത്താന്‍ വേണ്ടിയാണ്. നഷ്ടം സംഭവിക്കുന്നത് പ്രവര്‍ത്തകന്റെ കുടുംബത്തിനും. ഇതാണ് സി.പി.എമ്മിന്റേയും ബി.ജെ.പിയുടേയും രാഷ്ട്രീയ ലാഭം. ഡി.സി.സി അധ്യക്ഷന്‍മാരെ സംബന്ധിച്ച ചര്‍ച്ചകള്‍ പൂര്‍ത്തിയായിട്ടില്ല. ഡി.സി.സി അധ്യക്ഷന്‍മാരുടെ ലിസ്റ്റ് നവംബറില്‍ പ്രസിദ്ധീകരിക്കുമെന്നും അദ്ദേഹം പറഞ്ഞു.
അംഗീകരിക്കില്ല:

വ്യക്തിനിയമ
സംരക്ഷണ സിമിതി
കൊല്ലം: ബി.ജെ.പിയുടെ രാഷ്ട്രീയ അജണ്ടയായ ഏക സിവില്‍കോഡ് നടപ്പാക്കാനുള്ള ശ്രമത്തെ അംഗീകരിക്കില്ലെന്ന് വ്യക്തിനിയമ സംരക്ഷണ സമിതി ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു.
ഹിന്ദുത്വ രാഷ്ട്രീയ വാദികള്‍ ലക്ഷ്യം വയ്ക്കുന്ന ഏക സംസ്‌കാര വാദത്തിന്റെ ഭാഗമാണ് ഏക സിവില്‍കോഡ്. മുസ്‌ലിം സ്ത്രീ സുരക്ഷയുടെ പേര് പറഞ്ഞ് ഭരണഘടന ഉറപ്പുനല്‍കുന്ന മതവിശ്വാസത്തിന് മേലുള്ള കടന്നുകയറ്റമാണ് ഇത്. മുസ്‌ലിം സ്ത്രീകളുടെ സുരക്ഷയാണ് സര്‍ക്കാര്‍ ഉത്തരവാദിത്വമെന്നും അതുകൊണ്ടാണ് ഏക സിവില്‍കോഡിനായി വാദിക്കുന്നതെന്നും പറയുന്ന പ്രധാനമന്ത്രി നരേന്ദ്രമോദി മുഖ്യമന്ത്രിയായിരുന്ന ഗുജറാത്തില്‍ വിധവകളാക്കിയ സ്ത്രീകളെ കുറിച്ച് ഒരക്ഷരം മിണ്ടുന്നില്ല.
മുസ്‌ലിം പേഴ്‌സണല്‍ ലോ ബോര്‍ഡ് രാജ്യ വ്യാപകമായി ആഹ്വാനം ചെയ്ത ഏക സിവില്‍ കോഡിനെതിരേയുള്ള പ്രചാരണത്തിന്റെയും നിലപാട് വ്യക്തമാക്കുന്നതിന്റേയും ഭാഗമായി നാളെ വൈകീട്ട് നാലിന് കൊല്ലം കര്‍ബല മൈതാനിയില്‍ അവകാശ സംരക്ഷണ സമ്മേളനം സംഘടിപ്പിക്കുമെന്നും ഭാരവാഹികള്‍ അറിയിച്ചു.
സമസ്ത കേരള ജംഇയ്യത്തുല്‍ ഉലമ സംസ്ഥാന ജനറല്‍ സെക്രട്ടറി പ്രൊഫ.ആലികുട്ടി മുസ്‌ല്യാര്‍, ദക്ഷിണ കേരള ജംഇയ്യത്തുല്‍ ഉലമ സംസ്ഥാന സെക്രട്ടറി ചേലക്കുളം അബുല്‍ ബുഷ്‌റ മൗലവി, പേഴ്‌സണല്‍ ലോ ബോര്‍ഡ് വര്‍ക്കിങ് കമ്മിറ്റിയംഗം മുഫ്തി ഇഅ്ജാസ് അര്‍ഷദ് ഖാസിമി, റിഹാബ് ഇന്ത്യ ഫൗണ്ടേഷന്‍ ചെയര്‍മാന്‍ ഇ .അബൂബക്കര്‍, സമസ്ത കേരള സുന്നി ജംഇയത്തുല്‍ ഉലമ നേതാവ് പി .എ. ഹൈദ്രൂസ് മുസ്‌ലിയാര്‍, ആള്‍ ഇന്ത്യാ ഇമാംസ് കൗണ്‍സില്‍ സംസ്ഥാന പ്രസിഡന്റ് മുഹമ്മദ് ഈസാ ഫാളില്‍ മമ്പഈ, ജംഇയ്യത്തുല്‍ ഉലമാ ഹിന്ദ് സംസ്ഥാന പ്രസിഡന്റ് കാഞ്ഞാര്‍ ഹുസൈന്‍ മൗലാന, എം .ഐ ഷാനവാസ് എംപി, എം .നൗഷാദ് എം.എല്‍.എ, മുന്‍ എം.എല്‍.എ എ .യൂനുസുകുഞ്ഞ്, പി.ഡി.പി സംസ്ഥാന ജനറല്‍ സെക്രട്ടറി മൈലക്കാട് ഷാ, എം.ഇ.എസ് സംസ്ഥാന ജനറല്‍ സെക്രട്ടറി പ്രഫ.പി ഒ ജെ ലബ്ബ തുടങ്ങി പ്രമുഖര്‍ സമ്മേളനത്തില്‍ പങ്കെടുക്കും.
വാര്‍ത്താ സമ്മേളനത്തില്‍ വ്യക്തിനിയമ സംരക്ഷണ സിമിതി ചെയര്‍മാന്‍ മുവാറ്റുപുഴ അഷ്‌റഫ് മൗലവി, ജനറല്‍ കണ്‍വീനര്‍ കുരീപ്പള്ളി ഷാജഹാന്‍ ഫൈസി, വൈസ് ചെയര്‍മാന്‍ ഷറഫ് എം.എം.കെ, ജെ. കെ ഹാഷിം എന്നിവര്‍ പങ്കെടുത്തു.