മലപ്പുറം: നയപരമായ വിഷയങ്ങളില്‍പോലും ഏകപക്ഷീയ തീരുമാനമെടുക്കുകയും അക്കാദമിക സ്ഥാപനങ്ങളും വേദികളും രാഷ്ട്രീയവത്കരിക്കുകയും ചെയ്യുന്ന തെറ്റായ നയങ്ങളില്‍ പ്രതിഷേധിച്ച് ആറാം പ്രവൃത്തിദിനമായ നവംബര്‍ അഞ്ചിലെ ക്ലസ്റ്റര്‍ യോഗം ബഹിഷ്‌കരിക്കാന്‍ കെ.എസ്. ടി.യു സംസ്ഥാന നേതൃയോഗം തീരുമാനിച്ചു.
കഴിഞ്ഞ ക്ലസ്റ്റര്‍ യോഗം പ്രഹസനമായിരുന്നു. മൊഡ്യൂള്‍ ചര്‍ച്ച പോലും നടന്നില്ലെന്ന് യോഗം കുറ്റപ്പെടുത്തി. ബഹിഷ്‌കരിക്കുന്നതിന്റെ ഭാഗമായി ഇന്ന് ജില്ലാതലങ്ങളിലും നാളെ സബ്ജില്ലാ തലങ്ങളിലും സംയുക്ത അധ്യാപക സമിതിയോഗം ചേരും. നേതൃയോഗത്തില്‍ വൈസ് പ്രസിഡന്റ് സി. കെ അഹമ്മദ്കുട്ടി ഉദ്ഘാടനം ചെയ്തു. പ്രസിഡന്റ് സി. പി ചെറിയമുഹമ്മദ് അധ്യക്ഷനായി. സെക്രട്ടറി എ.കെ സൈനുദ്ദീന്‍, പി.കെ.എം ഷഹീദ് പ്രസംഗിച്ചു.