സീതാംഗോളി: സീതാംഗോളിയില്‍ സി.പി.എം- ബി.ജെ.പി പ്രവര്‍ത്തകര്‍ തമ്മില്‍ സംഘര്‍ഷം. സംഘര്‍ഷത്തില്‍ രണ്ടുപേര്‍ക്ക് പരുക്കേറ്റു. സീതാംഗോളി മുഖാരിക്കണ്ടത്തില്‍ ഇന്നലെ രാത്രിയിലാണ് സംഘട്ടനമുണ്ടായത്. സി.പി.എം പ്രവര്‍ത്തകന്‍ മുഖാരിക്കണ്ടത്തെ സുജിത് കുമാര്‍ (31), ബി.ജെ.പി പ്രവര്‍ത്തകന്‍ രവി (34) എന്നിവര്‍ക്കാണ് പരുക്കേറ്റത്. സുജിത്തിനെ കുമ്പള സഹകരണ ആശുപത്രിയിലും രവിയെ കാസര്‍കോട് ജനറല്‍ ആശുപത്രിയിലും പ്രവേശിപ്പിച്ചു.
സി.പി.എം പ്രവര്‍ത്തകന്‍ മുരളിയുടെ രക്തസാക്ഷിദിനത്തോടനുബന്ധിച്ച് സീതാംഗോളിയില്‍ ബാനര്‍ സ്ഥാപിച്ചതിനെച്ചൊല്ലി കഴിഞ്ഞ ദിവസം സി.പി.എം- ബി.ജെ.പി പ്രവര്‍ത്തകര്‍ തമ്മില്‍ വാക്കുതര്‍ക്കമുണ്ടായിരുന്നു. ഇതിന്റെ തുടര്‍ച്ചയാണ് അക്രമമെന്ന് കരുതുന്നു. സുജിത്തിന്റെ പരാതിയില്‍ ബി.ജെ.പി. പ്രവര്‍ത്തകര്‍ക്കെതിരെ കുമ്പള പൊലിസ് കേസെടുത്തിട്ടുണ്ട്.സംഘര്‍ഷത്തെ തുടര്‍ന്ന് സ്ഥലത്ത് പൊലിസ് പിക്കറ്റ് ഏര്‍പ്പെടുത്തി.