തിരുവനന്തപുരം: സംസ്ഥാനത്തെ ഗുണ്ടാസംഘങ്ങളെ അമര്‍ച്ച ചെയ്യുന്നതിന് പ്രത്യേക സംഘം രൂപീകരിച്ചു. സംസ്ഥാനത്തൊട്ടാകെയുള്ള ഗുണ്ടാവിരുദ്ധ സ്‌ക്വാഡുകളുടെ മേല്‍നോട്ടച്ചുമതല പൊലിസ് ട്രെയിനിങ് കോളജ് പ്രിന്‍സിപ്പലും എസ്.പിയുമായ പി.പ്രകാശിനായിരിക്കും. സിവില്‍ പൊലിസ് ഓഫിസര്‍ മുതല്‍ എസ്.ഐ റാങ്കുവരെയുള്ള 10 പേര്‍ അടങ്ങുന്ന സംഘം സംസ്ഥാനതലത്തില്‍ എസ്.പിയുടെ കീഴിലുണ്ടാകും. പൊലിസ് ട്രെയിനിങ് കോളജ് ആസ്ഥാനമായി ഈ സംഘം പ്രവര്‍ത്തിക്കും. സംസ്ഥാനതല സ്‌ക്വാഡിന്റെ ഭാഗമായി എസ്.സി.ആര്‍.ബി.എസ്.പിയും പ്രവര്‍ത്തിക്കും. സംസ്ഥാനത്തെ ഗുണ്ടാസംഘങ്ങളെക്കുറിച്ചുള്ള വിവരങ്ങള്‍ ശേഖരിക്കുന്ന ചുമതല എസ്.സി.ആര്‍.ബി. എസ്.പിയ്ക്കായിരിക്കും. വിവിധ ജില്ലകളിലെ പ്രവര്‍ത്തിക്കുന്നതും സമീപകാലത്ത് രംഗത്തുണ്ടായിരുന്നവരുമായ ഗുണ്ടകളെയും ഗുണ്ടാസംഘങ്ങളെയും സംബന്ധിച്ച വിവരങ്ങള്‍ ഈ എസ്.പിമാര്‍ ശേഖരിക്കും.

ഗുണ്ടകളെ സംരക്ഷിക്കുന്നവരെക്കുറിച്ചുള്ള വിവരങ്ങളും ഗുണ്ടകളുടെ പ്രവര്‍ത്തനരീതി താവളം, തടവില്‍ കഴിയുന്ന ഗുണ്ടകള്‍ തുടങ്ങിയ വിവരങ്ങളും ശേഖരിക്കും. ഗുണ്ടാവിരുദ്ധ സ്‌ക്വാഡിന്റെ പ്രവര്‍ത്തനങ്ങള്‍ ഹെഡ്ക്വാര്‍ട്ടര്‍ ഐ.ജിക്ക് നേരിട്ട് റിപ്പോര്‍ട്ട് ചെയ്യണമെന്ന് സംസ്ഥാന പൊലിസ് മേധാവി നിര്‍ദേശിച്ചിട്ടുണ്ട്. കൂടാതെ ഇന്റലിജന്‍സ് എ.ഡി.ജി.പിയുടെ നേതൃത്വത്തില്‍ ഇന്റലിജന്‍സ് ആസ്ഥാനത്ത് 'ഓര്‍ഗനൈസ്ഡ് ക്രൈം ഇന്റലിജന്‍സ് ' വിഭാഗവും രൂപീകരിച്ചിട്ടുണ്ട്. എറണാകുളം, കോഴിക്കോട് എന്നീ മേഖലകളായി തിരിച്ചായിരിക്കും ഇതിന്റെ പ്രവര്‍ത്തനം. ജില്ലകളില്‍ ഓരോ സബ് ഇന്‍സ്‌പെക്ടറുടെ കീഴില്‍ ജില്ലാതല ഗുണ്ടാ വിരുദ്ധ സ്‌ക്വാഡുകള്‍ക്ക് രൂപം നല്‍കാനും സംസ്ഥാന പൊലിസ് മേധാവി നിര്‍ദേശം നല്‍കിയിട്ടുണ്ട്.

എറണാകുളം സിറ്റി-20, തിരുവനന്തപുരം സിറ്റി-18, തിരുവനന്തപുരം റൂറല്‍-15, കോഴിക്കോട് സിറ്റി-15, കൊല്ലം സിറ്റി-10, തൃശ്ശൂര്‍ സിറ്റി-10 എന്ന ക്രമത്തിലും മറ്റ് ജില്ലകളില്‍ നിന്നും 10 പേര്‍ വീതവും അംഗങ്ങള്‍ ജില്ലാ ഗുണ്ടാ വിരുദ്ധ സ്‌ക്വാഡിലുണ്ടാകും. ഇവര്‍ക്ക് പൊലിസ് ട്രെയിനിങ് കോളജില്‍ രണ്ട് ദിവസത്തെ പരിശീലനവും നല്‍കും. ജില്ലാ സ്‌ക്വാഡുകളുടെ മേല്‍നോട്ടം ജില്ലാ പൊലിസ് മേധാവിമാര്‍ നിര്‍വഹിക്കും. സംസ്ഥാന സ്‌ക്വാഡ് എസ്.പി.ക്കും ഇവരുടെ മേല്‍നോട്ടച്ചുമതലുയുണ്ടാകും. ഒന്നിലധികം ജില്ലകളുമായി ബന്ധപ്പെട്ട കാര്യങ്ങള്‍ മുഖ്യമായും സംസ്ഥാന സ്‌ക്വാഡ് കൈകാര്യം ചെയ്യും. ജില്ലാ സ്‌പെഷല്‍ ബ്രാഞ്ചിലേയും ഷാഡോ ടീമിലേയും അംഗങ്ങള്‍ ഗുണ്ടാ വിരുദ്ധ സ്‌ക്വാഡിനാവശ്യമായ പിന്തുണ നല്‍കും.