നിലമ്പൂര്‍: ചാലിയാര്‍ പഞ്ചായത്തിലെ മുട്ടിയാല്‍-ചെമ്പന്‍കൊല്ലി റോഡില്‍ ചെന്നെപ്പൊയില്‍ സ്വകാര്യ വ്യക്തി പഞ്ചായത്ത് സ്ഥലത്തെ പ്ലാവ് മുറിച്ചുനീക്കിയത് വിവാദമാകുന്നു.
അഹമ്മദ് കുട്ടി എന്നയാള്‍ കഴിഞ്ഞ 23ന് പ്ലാവ് മുറിച്ചെന്ന് കാണിച്ച് പൊട്ടനാനിക്കുന്നേല്‍ നല്‍കിയ പരാതിയുടെ അടിസ്ഥാനത്തില്‍ ഗ്രാമ പഞ്ചായത്ത് സെക്രട്ടറി സത്യകുമാര്‍ നടത്തിയ അന്വേഷണത്തില്‍ റോഡില്‍ നിന്ന പ്ലാവുതന്നെയാണ് മുറിച്ചതെന്ന് കണ്ടെത്തുകയും ഇതിന്റെ അടിസ്ഥാനത്തില്‍ പഞ്ചായത്തിന് നഷ്ടപരിഹാരം നല്‍കാന്‍ മരംമുറിച്ചയാളോട് ആവശ്യപ്പെട്ടിട്ടുണ്ട്.
ഇതിനിടയില്‍ മുറിച്ച മരം ഇയാള്‍ വില്‍പ്പന നടത്തിയതായും ആക്ഷേപമുണ്ട്. പ്ലാവ് മുറിച്ചിട്ട സ്ഥലത്ത് നിന്ന് പഞ്ചായത്തിന്റെ അനുമതിയില്ലാതെ നീക്കം ചെയ്തിട്ടുണ്ടെങ്കില്‍ ഇയാളുടെ പേരില്‍ പൊലിസില്‍ പരാതി നല്‍കുമെന്നും പഞ്ചായത്തിന്റെ അനുമതിയില്ലാതെ ഭൂമിയിലെ മരം മുറിച്ചതിന് ആവശ്യമായ നിയനടപടികള്‍ സ്വീകരിക്കുമെന്നും ഗ്രാമപഞ്ചായത്ത് സെക്രട്ടറി സത്യകുമാര്‍ പറഞ്ഞു.