കോഴിക്കോട്: നിരന്തരമായുള്ള ഉപഭോക്താക്കളുടെ പരാതികള്‍ പരിഹരിക്കാന്‍ നാലിന പദ്ധതികളുമായി കെ.എസ്.ഇ.ബി. വൈദ്യുതി തടസവും പുനഃസ്ഥാപനവും ഉപഭോക്താക്കളെ അറിയിക്കുന്ന ഊര്‍ജദൂത്, ബില്‍തുക, പണമടയ്ക്കാനുള്ള തിയതി എന്നിവ എസ്.എം.എസ്, ഇ മെയില്‍ വഴി അറിയിക്കുന്ന ഊര്‍ജ സൗഹൃദ്, പരാതികള്‍ രേഖപ്പെടുത്താന്‍ 1912 എന്ന ടോള്‍ ഫ്രീ നമ്പര്‍, പരാതികള്‍ 9496001912 എന്ന വാട്‌സ്ആപ്പ് നമ്പര്‍ വഴി അയയ്ക്കാനുള്ള സംവിധാനം എന്നിവയാണ് കെ.എസ്.ഇ.ബി ആരംഭിക്കുന്ന നാലു പദ്ധതികള്‍. ഉപഭോക്താക്കള്‍ക്കു മൊബൈല്‍ ഫോണില്‍ സേവനങ്ങള്‍ ലഭ്യമാക്കുന്നതിനുള്ള പദ്ധതികള്‍ ഈ മാസം പകുതിയോടെ പ്രാവര്‍ത്തികമാക്കാന്‍ കഴിയുമെന്ന പ്രതീക്ഷയിലാണ് അധികൃതര്‍.
 അറ്റകുറ്റപ്പണികള്‍ക്കിടയിലും മഴയുള്ള സമയത്തുമെല്ലാം വൈദ്യുതി മുടങ്ങുന്നത് പതിവാണ്. ഇതുമൂലമുണ്ടാകുന്ന ജനങ്ങളുടെ ചോദ്യങ്ങള്‍ക്കു മറുപടി നല്‍കാന്‍ അധികൃതര്‍ക്ക് സാധിക്കാറില്ല. വിളിച്ചാല്‍ ഫോണെടുക്കുന്നില്ലെന്ന ജനങ്ങളുടെ ആക്ഷേപവും പതിവാണ്. ഊര്‍ജദൂത് സംവിധാനം വരുന്നതോടെ ഈ പ്രശ്‌നങ്ങള്‍ക്കെല്ലാം പരിഹാരമാകും. ബില്ല് അടക്കാന്‍ മറന്നുപോകുന്നതാണ് ഉപഭോക്താക്കള്‍ക്കിടയിലെ മറ്റൊരു പ്രധാന പ്രശ്‌നം. ബില്ല് കിട്ടിയില്ലെന്ന പരാതികളും നിരവധിയാണ്. ഊര്‍ജസൗഹൃദ് പദ്ധതിയിലൂടെ ഇതും പരിഹരിക്കാനാകും. ബില്ല് തുക കൃത്യമായി ആദ്യം തന്നെ ഉപഭോക്താക്കളെ അറിയിക്കും. പിന്നീട് തുക അടക്കാനുള്ള അവസാന ദിവസത്തിനു രണ്ടുദിവസം മുന്‍പും ബില്ലടച്ചു കഴിഞ്ഞതിനു ശേഷവും സന്ദേശവും ലഭിക്കും. ഇതിലൂടെ വ്യവസായസ്ഥാപനങ്ങള്‍ക്ക് 2, 3 തിയതികളില്‍ തന്നെ ബില്ല് ലഭിക്കുമെന്ന പ്രത്യേകതയുമുണ്ട്. സലെയ.ശി എന്ന വെബ്‌സൈറ്റില്‍ ലോഗിന്‍ ചെയ്ത് വെബ് സെല്‍ സര്‍വിസില്‍ വൈദ്യതി കണ്‍സ്യൂമര്‍ നമ്പറും മൊബൈല്‍ നമ്പറും എന്റര്‍ ചെയ്യുന്നതിലൂടെ ഉപഭോക്താക്കള്‍ക്ക് മൊബൈല്‍ വഴി മെസേജ് സേവനം ലഭ്യമാകും.
24 മണിക്കൂറും വൈദ്യുതി ബില്ലടയ്ക്കാന്‍ സാധിക്കുന്ന എനി ടൈം പര്‍ച്ചേഴ്‌സ് മെഷിനും ഉടന്‍ കോവൂരില്‍ പ്രവര്‍ത്തനം തുടങ്ങും.