കുന്നംകുളം: നഗരസഭക്കെതിരേ ഹൈക്കോടതി നോട്ടീസയച്ചു. നിയമാനുസൃതം അറവുശാലയില്ലാത്ത സ്ഥലങ്ങളില്‍ ഇത് സ്ഥാപിക്കാനും അല്ലാത്ത പക്ഷം മാംസ കച്ചവടം നിര്‍ത്തലാക്കുന്നതിനുമായി കോടതി നല്‍കിയ നിര്‍ദ്ദേശം ലംഘിച്ചതിനെ തുടര്‍ന്നുള്ള പരാതിയിന്‍മേലാണ് ഹൈക്കോടതി നഗരസഭക്ക് നോട്ടീസയച്ചത്.
നഗരസഭ അതിര്‍ത്തിയില്‍ നടക്കുന്ന മാംസ കച്ചവട സ്റ്റാളുകള്‍ അടച്ചിട്ട് രണ്ടാഴ്ചക്കകം കോടതിയെ അറിയിക്കണമെന്ന് കാണിച്ചാണ് ഹൈക്കോടതി നഗരസഭ സെക്രട്ടറിക്ക് കത്ത് നല്‍കിയിരിക്കുന്നത്. ഇതിന്റ പകര്‍പ്പ് ജില്ലാ പൊലിസ് മേധാവിക്കും, കളക്ടര്‍ക്കും നല്‍കി. നഗരസഭയില്‍ അറവുശാല നിലവിലില്ലാത്ത സാഹചര്യത്തില്‍ തീര്‍ത്തും അശാസ്ത്രീയമായി മൃഗങ്ങളെ കൊന്നെടുത്താണ് മാംസ വില്‍പന നടത്തുന്നതെന്ന് സ്‌പെഷല്‍ ബ്രാഞ്ച്
പൊലിസ് നല്‍കിയ റിപ്പോര്‍ട്ടും, പൊതു ജനപരാതിയും കണക്കിലെടുത്തായിരുന്നു ഹൈക്കോടതി വിധി പുറപെടുവിച്ചത്. എന്നാല്‍ കുന്നംകുളം നഗരസഭ ഈ വിധി നിരാകരിച്ചതായി കാണിച്ച് കൗണ്‍സിലര്‍ സോമന്‍ ചെറുക്കുന്ന് നല്‍കിയ കോടതിയലക്ഷ്യ കേസ് കഴിഞ്ഞ ആഴ്ച ഹൈക്കോടതി ഫയലില്‍ സ്വീകരിച്ചിരുന്നു.
പരാതിക്കൊപ്പം നഗരസഭ ആരോഗ്യ വിഭാഗം മാംസ വില്‍പന അനധികൃതമാണെന്ന് കാണിച്ച് നല്‍കിയ തെളിവും കോടതിയില്‍ സമര്‍പ്പിച്ചു.
ഇതോടെയാണ് നഗരസഭക്കെതിരെ നോട്ടീസയക്കാനുള്ള സാഹചര്യം ഉടലടുത്തത്. കുന്നംകുളത്ത് അറവുശാല സ്ഥാപിക്കാന്‍ കരാറേറ്റെടുത്ത സ്വകാര്യ സ്ഥാപനം മുന്‍കൂര്‍ പണം കൈപറ്റി പ്രവര്‍ത്തി ഉപേക്ഷിച്ചു പോയിരുന്നു. ഏഴ് വര്‍ഷം പിന്നിട്ടിട്ടും പ്രവര്‍ത്തി നടത്താന്‍ മുതിരാത്ത സ്ഥാപനത്തിനെതിരെ നിയമ നടപടികള്‍ സ്വീകരിക്കാനും ആര്‍.എം.പി തയ്യാറെടുക്കുന്നതായി പറയുന്നു.
15 വര്‍ഷം മുന്‍പ് റോഡരികിലെ മത്സ്യവില്‍പന നിരോധിച്ച് ഹൈക്കോടതിയുടെ വിധി നിലവില്‍ വന്നിരുന്നു.