കാസര്‍കോട്:    ജില്ലാ പഞ്ചായത്ത് പദ്ധതികളുടെ വീഴ്ച സംബന്ധിച്ച് സംസ്ഥാന ഓഡിറ്റ് വകുപ്പിന്റെയും എ.ജി ഓഡിറ്റ് റിപ്പോര്‍ട്ടിന്റെയും അടിസ്ഥാനത്തില്‍ ബന്ധപ്പെട്ട നിര്‍വഹണ ഉദ്യോഗസ്ഥര്‍ ഈമാസം 20 നകം നിയമാനുസൃത മറുപടി നല്‍കണമെന്നു ജില്ലാ പഞ്ചായത്ത് യോഗം നിര്‍ദേശിച്ചു. 2013-14, 2014-15 വര്‍ഷത്തേക്കുള്ള സംസ്ഥാന ഓഡിറ്റ് വകുപ്പിന്റെ റിപ്പോര്‍ട്ടും 2011-12 മുതല്‍ 2015-16 വര്‍ഷത്തേക്കുളള എ.ജി ഓഡിറ്റ്  റിപ്പോര്‍ട്ടുമാണ് അവതരിപ്പിച്ചത്. നടപ്പിലാക്കിയ പല പദ്ധതികളും  ഓഡിറ്റ് അന്വേഷണങ്ങള്‍ക്കു കൃത്യമായി റിപ്പോര്‍ട്ട് ചെയ്യാത്തതിനാലാണു വീഴ്ചയായി റിപ്പോര്‍ട്ടില്‍ പരാമര്‍ശിക്കപ്പെട്ടത്. നിര്‍വഹണ ഉദ്യോഗസ്ഥര്‍ ഇതിനെ ഗൗരവമായി കണക്കിലെടുക്കണം. ജില്ലാ പഞ്ചായത്ത്  സ്ഥിരംസമിതികള്‍ ഇനി മുതല്‍ നടപ്പാക്കുന്ന പദ്ധതികള്‍ കൃത്യമായി മോണിറ്ററിങ് നടത്തും. ഈ മാസം 20 നകം റിപ്പോര്‍ട്ട് ഓഡിറ്റ് വകുപ്പിനും ജില്ലാ പഞ്ചായത്തിനും ലഭ്യമാക്കുന്നതിനു ജില്ലാ പഞ്ചായത്ത് പ്രസിഡന്റ് കര്‍ശന നിര്‍ദേശം നല്‍കി. വിവിധ വകുപ്പുകള്‍ നടപ്പിലാക്കിയ പദ്ധതികളുടെ ഫയലുകള്‍ കൃത്യമായി പരിശോധിച്ചു സംസ്ഥാന ഓഡിറ്റ് വകുപ്പിനു മറുപടി നല്‍കുന്നതില്‍ വീഴ്ച സംഭവിച്ചതായി യോഗം വിലയിരുത്തി.
    ജില്ലാ പഞ്ചായത്ത് കോണ്‍ഫറന്‍സ് ഹാളില്‍ നടന്ന യോഗത്തില്‍ ജില്ലാ പഞ്ചായത്ത് പ്രസിഡന്റ് എ.ജി.സി ബഷീര്‍ അധ്യക്ഷനായി. സെക്രട്ടറി ഇ.പി രാജ്‌മോഹന്‍ ഓഡിറ്റ് റിപ്പോര്‍ട്ട് അവതരിപ്പിച്ചു. വൈസ് പ്രസിഡന്റ് ശാന്തമ്മാ ഫിലിപ്പ്, അംഗങ്ങളായ ഹര്‍ഷാദ് വൊര്‍ക്കാടി, ജോസ് പതാലില്‍, എം കേളുപ്പണിക്കര്‍, ഇ പത്മാവതി, കെ ശ്രീകാന്ത്, ഷാനവാസ് പാദൂര്‍, പുഷ്പ അമേക്കള, പി.വി പത്മജ ബ്ലോക്ക് പഞ്ചായത്ത് പ്രസിഡന്റുമാരായ എം ഗൗരി, എ.കെ.എം അഷ്‌റഫ് തുടങ്ങിയവര്‍ സംബന്ധിച്ചു.