കൊച്ചി: കേന്ദ്ര സര്‍ക്കാര്‍ മുന്നൊരുക്കങ്ങള്‍ ഇല്ലാതെ നടപ്പാക്കിയ നോട്ട് നിരോധനം മൂലം നോട്ടിനുണ്ടായ ക്ഷാമംകൊണ്ട് സമരമുഖമായി റിസര്‍വ്ബാങ്കും. കലൂര്‍ ലിസി ജങ്ഷനിലെ റിസര്‍വ് ബാങ്ക് റീജണല്‍ ഓഫിസിലേക്ക് വിവിധ രാഷ്ട്രീയ പാര്‍ട്ടികളുടെ യുവജന സംഘടനകള്‍ മാര്‍ച്ച് നടത്തി.യൂത്ത് കോണ്‍ഗ്രസ് എറണാകുളം പാര്‍ലമെന്റ് കമ്മിറ്റിയുടെനേതൃത്വത്തില്‍ മണപ്പാട്ടിപറമ്പില്‍ നിന്ന് എത്തിയ മാര്‍ച്ച് റിസര്‍വ്വ് ബാങ്കിന് സമീപം പൊലിസ് തടഞ്ഞതിനെ തുടര്‍ന്ന് പ്രവര്‍ത്തകര്‍ ഗേറ്റിന് മുന്നില്‍ കുത്തിയിരുന്ന് പ്രതിഷേധിച്ചു. തുടര്‍ന്നു നടന്ന ധര്‍ണ എറണാകുളം ഡി.സി.സി പ്രസിഡന്റ് വി.ജെ പൗലോസ് ഉദ്ഘാടനം ചെയ്തു. യൂത്ത് കോണ്‍ഗ്രസ് പാര്‍ലമെന്റ് പ്രസിഡന്റ് എം.വി രതീഷ് അധ്യക്ഷത വഹിച്ചു.
കറന്‍സി വിതരണം യുദ്ധകാല അടിസ്ഥാനത്തില്‍ പൂര്‍ത്തിയാക്കണമെന്നും, പണം പിന്‍വലിക്കല്‍ വ്യവസ്ഥകള്‍ ലഘൂകരിക്കണമെന്നും നേതാക്കള്‍ ആവശ്യപ്പെട്ടു. യൂത്ത് കോണ്‍ഗ്രസ്സ് സംസ്ഥാന സെക്രട്ടറിമാരായ ദീപക് ജോയ്, അജിത് അമീര്‍ ബാവ, മുന്‍ മേയര്‍ ടോണി ചമ്മിണി, ഡി.സി.സി വൈസ് പ്രസിഡന്റുമാരായ മനോജ് മൂത്തേടന്‍, മുഹമ്മദ് ഷിയാസ്, ജനറല്‍ സെക്രട്ടറി കെ.എക്‌സ് സേവ്യര്‍, എറണാകുളം ബ്ലോക്ക് കോണ്‍ഗ്രസ് പ്രസിഡന്റ് ഹെന്റി ഓസ്റ്റിന്‍, ജോസഫ് മാര്‍ട്ടിന്‍, പി.എം നജീബ്, പി.വൈ ഷാജഹാന്‍, പി.എ സഗീര്‍ എന്നിവര്‍ സംസാരിച്ചു.
തുടര്‍ന്ന് പ്രവര്‍ത്തകര്‍ ഓഫിസിലേക്ക് തള്ളിക്കയറാന്‍ ശ്രമിച്ചത് പൊലിസുമായി സംഘര്‍ഷത്തില്‍ കലാശിച്ചു. എറണാകുളം സെന്‍ട്രല്‍ സര്‍ക്കിള്‍ ഇന്‍സ്‌പെക്ടര്‍ അനന്തലാലിന്റ നേതൃത്വത്തില്‍ പ്രവര്‍ത്തകരെ ബലം പ്രയോഗിച്ച് നീക്കി.യുത്ത് കോണ്‍ഗ്രസിന്റെ മാര്‍ച്ചിനു പിന്നാല ഡിവൈ.എഫ്.ഐ ജില്ലാ കമ്മിറ്റിയുടെ നതൃത്വത്തില്‍ റിസര്‍വ്വ് ബാങ്ക് റീജണല്‍ ഓഫിസിലേക്ക് മാര്‍ച്ച് നടത്തി. കലൂരില്‍ നിന്നാരഭിച്ച മാര്‍ച്ച് റിസര്‍വ്വ് ബാങ്ക് റീജണല്‍ ഓഫീസിനു മുന്നില്‍ പൊലിസ് തടഞ്ഞു.
തുടര്‍ന്ന് നടന്ന പ്രതിഷേധയോഗം ഡി.വൈ.എഫ്.ഐ സംസ്ഥാന ജോയിന്റ് സെക്രട്ടറി എസ് സതീഷ് ഉദ്ഘാടനം ചെയ്തു. ജില്ലാ വൈസ് പ്രസിഡന്റ് കെ.വി അനില്‍ അധ്യക്ഷനായി. ഡി.വൈ.എഫ്.ഐ നേതാക്കളായ പി.ബി രതീഷ്, സോളമന്‍സിജു, എ.പി പ്രിനില്‍, എം.കെ സിനീഷ്, എസ്.എഫ്്.ഐ ജില്ലാ സെക്രട്ടറി എന്‍.ബി ദുനൈദ്, ബിബിന്‍രാജ്, കെ.എം മസൂദ്, ആര്‍ രതീഷ് എന്നിവര്‍ മാര്‍ച്ചിന് നേതൃത്വം നല്‍കി.
നോട്ട് അസാധുവാക്കിയ നടപടിയില്‍ പ്രതിഷേധിച്ച് യൂത്ത്ഫ്രണ്ട്(ജേക്കബ്)വിഭാഗവും കൊച്ചി ആര്‍.ബി.ഐ ഓഫീസിലേക്ക് മാര്‍ച്ചും ധര്‍ണയും സംഘടിപ്പിച്ചു. സംസ്ഥാന പ്രസിഡന്റ് പ്രേംസണ്‍ മാഞ്ഞാമറ്റം ധര്‍ണ ഉദ്ഘാടനം ചെയ്തു.
വേണ്ടത്ര മുന്‍കരുതലുകള്‍ എടുക്കാതെയുള്ള നടപടി ജനജീവിതം ദുസ്സഹമാക്കിയതായി അദ്ദേഹം പറഞ്ഞു. പണം കയ്യില്‍വച്ച് പട്ടിണി കിടക്കേണ്ട അവസ്ഥയാണ് കേരളത്തിലെ ജനങ്ങളുടേതെന്നും അദ്ദേഹം പറഞ്ഞു. കലൂര്‍ മണപ്പാട്ടിപ്പറമ്പില്‍ നിന്നാരംഭിച്ച പ്രകടനം കേരള കോണ്‍ഗ്രസ് സംസ്ഥാന ജനറല്‍ സെക്രട്ടറി കെ.ജി പുരുഷോത്തമന്‍ ഉദ്ഘാടനം ചെയ്തു.
യൂത്ത് ഫ്രണ്ട് സംസ്ഥാന സ്റ്റെലിന്‍ പുല്ലംകോട്, മണ്‍സൂണ്‍ പാലയംപറമ്പില്‍ തുടങ്ങിയവര്‍ സംസാരിച്ചു.
വെല്‍ഫെയര്‍ പാര്‍ട്ടി ജില്ലാ സമതിയുടെ ആഭിമുഖ്യത്തില്‍ നടന്ന മാര്‍ച്ച് സംസ്ഥാന സമതി അംഗം ജോസഫ് ജോണ്‍ ഉദ്ഘാടനം ചെയ്തു.
ജില്ലാ പ്രസിഡന്റ് സമദ് നെടുമ്പാശ്ശേരി അധ്യക്ഷനായി. ജില്ലാ ജനറല്‍ സെക്രട്ടറി ജ്യോതിവാസ്,സെക്രട്ടറി കെ.എ സദീഖ് എന്നിവര്‍ സംസാരിച്ചു.