കാസര്‍കോട്: ജില്ലയില്‍ ജില്ലാ കൃഷിതോട്ടം അനുവദിക്കണമെന്ന് ജില്ലാ വികസന സമിതി യോഗം സര്‍ക്കാരിനോട് ആവശ്യപ്പെട്ടു. എം.രാജഗോപാലന്‍ എം.എല്‍.എയുടെ അനുവാദത്തോടെ നീലേശ്വരം നഗരസഭാ ചെയര്‍മാന്‍ പ്രൊഫ. കെ.പി ജയരാജനാണു പ്രമേയം അവതരിപ്പിച്ചത്.
നീലേശ്വരം ഉള്‍പ്പെടുന്ന കാസര്‍കോട് ജില്ലയുടെ മിക്ക പ്രദേശങ്ങളിലും സമ്പന്നമായ കൃഷി പാരമ്പര്യം നിലനിര്‍ത്തുന്ന പ്രദേശമാണ്. ഈ മേഖലയിലെ അമ്പതു ശതമാനത്തില്‍പരം ജനങ്ങള്‍ ഇന്നും കാര്‍ഷിക മേഖലയിലാണു പ്രവര്‍ത്തിച്ചു വരുന്നത്. തനതു കാര്‍ഷിക വിഭവങ്ങള്‍ മിക്കവയും പുനരുല്‍പാദന ക്ഷമത കുറഞ്ഞ് വംശനാശ ഭീഷണി നേരിടുന്ന അവസ്ഥയും നിലവിലുണ്ട്.
നവകേരള വിഷനു സംസ്ഥാനത്ത് തുടക്കം കുറിച്ചിട്ടുള്ളതിനാല്‍ ഡിസംബര്‍ എട്ടിന് ഇതിന്റെ വിവിധ പദ്ധതികള്‍ ആരംഭിക്കയാണ്. ജില്ലാതലത്തില്‍ താഴെത്തട്ടില്‍ വരെ ഇതിന്റെ സന്ദേശം എത്തേണ്ടതുണ്ട്. ജില്ലയില്‍ റവന്യൂ മന്ത്രിക്കാണ് ഏകോപനത്തിന്റെ ചുമതല. ഇതുമായി ബന്ധപ്പെട്ട അവലോകന യോഗം 29നു രാവിലെ 10 നു കലക്ടറേറ്റില്‍ ചേരും. മുഴുവന്‍ വകുപ്പ് മേധാവികളും ഇതില്‍ പങ്കെടുക്കണമെന്നു വികസന സമിതി നിര്‍ദേശിച്ചു.
വിവിധ വകുപ്പുകളുടെ കഴിഞ്ഞമാസത്തെ പ്രവര്‍ത്തന പുരോഗതി യോഗം വിലയിരുത്തി. വിവിധ വകുപ്പുകളിലെ ഒഴിവുകള്‍ റിപ്പോര്‍ട്ട് ചെയ്ത സാഹചര്യത്തില്‍ ജില്ലയിലാകെ 1227 ഒഴിവുകളാണ് അറിവായിട്ടുള്ളത്. ജില്ലയിലെ സമ്പൂര്‍ണ വൈദ്യുതീകരണ പ്രവൃത്തികള്‍ ത്വരിതഗതിയിലാക്കാന്‍ എം രാജഗോപാലന്‍ എം.എല്‍.എ നിര്‍ദേശിച്ചു.
ജില്ലാ പ്ലാനിങ് ഓഫിസര്‍ കെ.എം സുരേഷ് റിപ്പോര്‍ട്ട് അവതരിപ്പിച്ചു. എഡി.എം കെ അംബുജാക്ഷന്റെ അധ്യക്ഷതയില്‍ ചേര്‍ന്ന യോഗത്തില്‍ എം രാജഗോപാലന്‍ എം.എല്‍.എ, സബ് കലക്ടര്‍ മൃണ്‍മയി ജോഷി തുടങ്ങിയവര്‍ സംബന്ധിച്ചു.