പത്തനംതിട്ട: കടംകയറി നടുവൊടിഞ്ഞ സഹകരണ കണ്‍സ്യൂമര്‍ ഫെഡറേഷനെ സഹായിക്കാന്‍ വിഭാവനം ചെയ്ത പുനരുദ്ധാരണ പാക്കേജ് അട്ടിമറിക്കാന്‍ ഉദ്യോഗസ്ഥ നീക്കം. ഇടപാടുകള്‍ സുതാര്യമാക്കാനുള്ള പര്‍ച്ചേസ് കമ്മിറ്റി രൂപീകരണം അടക്കമുള്ള പാക്കേജിലെ നിര്‍ദേശങ്ങള്‍ അട്ടിമറിക്കാന്‍ ഉന്നതങ്ങളില്‍ ശ്രമം നടക്കുന്നുണ്ടെന്ന ആരോപണം ശക്തമാണ്. അതിനിടെ കണ്‍സ്യൂമര്‍ ഫെഡറേഷന്റെ കടമാകട്ടെ ആയിരം കോടിയും കടന്നിട്ടുണ്ട്.
ഇടപാടുകള്‍ സുതാര്യമാക്കുന്നതിന്റെ ഭാഗമായി പ്രാഥമിക സഹകരണ സംഘങ്ങളുടെ പ്രതിനിധികള്‍കൂടി ഉള്‍പ്പെട്ട പര്‍ച്ചേസ് കമ്മിറ്റി രൂപീകരിക്കുക, അനാവശ്യമായി വാടകയ്ക്ക് എടുത്തിരിക്കുന്ന ഓഫിസ് കെട്ടിടങ്ങളും ഗോഡൗണുകളും ഒഴിവാക്കുക, കെട്ടിക്കിടക്കുന്ന കേടായ സാധനങ്ങള്‍ കമ്പനികള്‍ക്ക് തിരികെ നല്‍കുക, ഉപയോഗശൂന്യമായതും കേടുപാടുകള്‍ പറ്റിയതുമായ വാഹനങ്ങള്‍ ലേലം ചെയ്യുക തുടങ്ങിയ നിര്‍ദേശങ്ങളാണ് പുനരുദ്ധാരണ പാക്കേജ് മുന്നോട്ടു വയ്ക്കുന്നത്.
കൂടാതെ വിപണിയിലെ ഇടപെടലുകള്‍ക്കായി പ്രാഥമിക സഹകരണ സംഘങ്ങള്‍ വഴി 1500 മുതല്‍ 2000 വരെ നീതി വിപണന കേന്ദ്രങ്ങളോ സൂപ്പര്‍ മാര്‍ക്കറ്റുകളോ പൊതുവിതരണ കേന്ദ്രങ്ങളോ തുടങ്ങാനും ഈ സ്ഥാപനങ്ങളിലേക്കുള്ള സാധനങ്ങള്‍ ഇ-ടെണ്ടര്‍ വഴി വാങ്ങി വിതരണം ചെയ്യാനും പദ്ധതിയുണ്ട്. മന്ത്രിസഭാ യോഗത്തില്‍ ഇത് സംബന്ധിച്ച തീരുമാനവും കൈക്കൊണ്ടിരുന്നു. എന്നാല്‍ ഉദ്യോഗസ്ഥര്‍ കാട്ടുന്ന കടുത്ത അലംഭാവം സര്‍ക്കാര്‍ നീക്കത്തിന് തിരിച്ചടി ആയിരിക്കുകയാണെന്നാണ് ആരോപണം. അതിനിടെ കൂടിവരുന്ന കട ബാധ്യതയും ഫെഡറേഷന്റെ നടുവൊടിക്കുകയാണ്.
വായ്പാ കുടിശ്ശിക, ഓഹരി മൂലധനം തുടങ്ങിയ വകയില്‍ 1083.03 കോടി രൂപയുടെ കടബാധ്യതയാണ് നിലവില്‍ ഫെഡറേഷനുള്ളത്. ബാങ്ക് വായ്പ, പലിശ എന്നീ ഇനങ്ങളിലായി 491.15 കോടി രൂപയുടെ കുടിശ്ശിക വേറെയും. കൂടാതെ സ്ഥിര നിക്ഷേപം സ്വീകരിച്ച തുകയുടെ മുതലും പലിശയും ചേര്‍ത്ത് 180.56 കോടി തിരികെ നല്‍കാനുണ്ട്. നീതി, ത്രിവേണി, മെഡിക്കല്‍ സ്‌റ്റോര്‍ എന്നിവ വഴി സാധനങ്ങള്‍ വിറ്റ വകയില്‍ 234.63 കോടി രൂപ വിതരണക്കാര്‍ക്കും നല്‍കാനുണ്ട്. സര്‍ക്കാര്‍സഹകരണ സ്ഥാപനങ്ങളില്‍ നിന്നും എടുത്ത വായ്പ ഇനത്തില്‍ പലിശയായി മാത്രം 121.09 കോടി രൂപയും വിവിധ സ്ഥാപനങ്ങളില്‍ നിന്നും ഓഹരി മൂലധനമായി സ്വീകരിച്ച 56.60 കോടി രൂപയും കൂടി ചേര്‍ത്തുള്ള ബാധ്യതയാണ് 1083.03 കോടിയില്‍ എത്തി നില്‍ക്കുന്നത്. സാധനങ്ങള്‍ വാങ്ങിയതടക്കം നിരവധി അഴിമതി ആരോപണങ്ങള്‍ നിലനില്‍ക്കുന്നതിനിടെയാണ് കണ്‍സ്യൂമര്‍ ഫെഡിന്റെ കോടികളുടെ ബാധ്യത സംബന്ധിച്ച വിവരം പുറത്തു വന്നിരിക്കുന്നത്. കെടുകാര്യസ്ഥതയും അനാവശ്യ ചെലവുമാണ് ബാധ്യതയ്ക്കു കാരണമായി ഫെഡറേഷന്‍ ഉദ്യോഗസ്ഥര്‍ തന്നെ ചൂണ്ടിക്കാട്ടുന്നത്.
പരാതികളെ തുടര്‍ന്ന് സഹകരണവകുപ്പ് നടത്തിയ പരിശോധനയില്‍, അഴിമതി നടന്നിട്ടുണ്ടെന്ന് വ്യക്തമായിരുന്നു. ഇതിന്റെ അടിസ്ഥാനത്തില്‍ നടക്കുന്ന അന്വേഷണത്തിന്റെ ഇടക്കാല റിപ്പോര്‍ട്ടില്‍ അഴിമതി നടത്തിയവരെപ്പറ്റി വ്യക്തമായ പരാമര്‍ശവുമുണ്ട്.
ഇതേ തുടര്‍ന്ന് ഇവര്‍ക്കെതിരേ നടപടി സ്വീകരിക്കാന്‍ സഹകരണ സംഘം രജിസ്ട്രാറുടെ സര്‍ക്കുലര്‍ പ്രകാരം വിവരങ്ങള്‍ പൊലിസിനു കൈമാറിയിട്ടുണ്ട്. എന്നാല്‍ ഈ നടപടി അട്ടിമറിക്കാന്‍ ചില ഉന്നതര്‍ ശ്രമിക്കുന്നതായും ജീവനക്കാര്‍ക്കിടയില്‍ ആരോപണം ഉണ്ട്.