തിരുവനന്തപുരം: 75കാരിയായ മാതാവിനെ മര്‍ദിച്ച കേസില്‍ അറസ്റ്റിലായ മകള്‍ക്കും മരുമകനുമൊപ്പം മറ്റു മക്കളും കുറ്റക്കാരാണെന്നു സംസ്ഥാന മനുഷ്യാവകാശ കമ്മിഷന്‍. മറവിരോഗം ബാധിച്ച പയ്യന്നൂര്‍ മാവിച്ചേരി പടിഞ്ഞാറേവീട്ടില്‍ കാര്‍ത്യായനിയമ്മയെ മകള്‍ മര്‍ദിച്ച സംഭവത്തില്‍ കമ്മിഷന്‍ സ്വമേധയാ രജിസ്റ്റര്‍ ചെയ്ത കേസിലാണ് ആക്റ്റിങ് ചെയര്‍മാന്‍ പി.മോഹനദാസിന്റെ നിരീക്ഷണം.
കണ്ണൂര്‍ ജില്ലാ പൊലിസ് മേധാവിയും ജില്ലാ സാമൂഹ്യക്ഷേമ ഓഫിസറും ഒരു മാസത്തിനകം അന്വേഷണ റിപോര്‍ട്ട് സമര്‍പ്പിക്കണം. കേസ് ഡിസംബറില്‍ വീണ്ടും പരിഗണിക്കും. മുതിര്‍ന്ന പൗരന്മാരുടെ ക്ഷേമം, ഗാര്‍ഹികപീഡന നിരോധനം തുടങ്ങിയ നിയമങ്ങളുടെ ലംഘനങ്ങാണു സംഭവിച്ചിരിക്കുന്നതെന്നു കമ്മിഷന്‍ ചൂണ്ടിക്കാണിച്ചു. പ്രായമായ മാതാപിതാക്കളെ നോക്കാന്‍ ആണ്‍മക്കള്‍ക്കും പെണ്‍മക്കള്‍ക്കും തുല്യമായ ഉത്തരവാദിത്തമുണ്ട്. ഇല്ലെങ്കില്‍ അതു മുതിര്‍ന്ന പൗരന്മാരുടെ ക്ഷേമം സംബന്ധിച്ച നിയമത്തിന്റെ ലംഘനമായി മാറും.
ഗാര്‍ഹികപീഡന നിരോധന നിയമപ്രകാരം സ്ത്രീകള്‍ വീട്ടിനുള്ളില്‍ പീഡിപ്പിക്കപ്പെട്ടാല്‍ നിയമത്തിന്റെ കണ്ണില്‍ മക്കള്‍ക്കു തുല്യ ഉത്തരവാദിത്തമുണ്ടെന്നും കമ്മീഷന്‍ പറഞ്ഞു. കാര്‍ത്യായനിയമ്മയെ മകള്‍ മര്‍ദിച്ച കേസില്‍ കുറ്റം തെളിഞ്ഞാല്‍ മകള്‍ക്കും മരുമകനുമൊപ്പം മറ്റുമക്കളും ശിക്ഷിക്കപ്പെടേണ്ടതാണെന്നും കമ്മിഷന്‍ പറഞ്ഞു.