വടക്കാഞ്ചേരി (തൃശൂര്‍): വടക്കാഞ്ചേരി പീഡനക്കേസിന്റെ അന്വേഷണം കോടതിയുടെ മേല്‍നോട്ടത്തില്‍ വേണമെന്ന ഇരയുടെ ആവശ്യം കോടതി അംഗീകരിച്ചു. വടക്കാഞ്ചേരി മജിസ്‌ട്രേറ്റ് കോടതിയുടേതാണ് ഉത്തരവ്. യുവതിയുടെ വാദങ്ങള്‍ അംഗീകരിച്ച കോടതി കേസന്വേഷണത്തില്‍ ഏറെ അപാകതകള്‍ കണ്ടെത്തി. 

അന്വേഷണസംഘത്തെ കുറിച്ച് വലിയ വിമര്‍ശനങ്ങള്‍ ഉയരുന്നുണ്ടെന്നും ഇനി അന്വേഷണം കോടതി നിരീക്ഷണത്തില്‍ മതിയെന്നും കോടതി ഉത്തരവിടുകയായിരുന്നു. 10 ദിവസം കൂടുമ്പോള്‍ അന്വേഷണ പുരോഗതി കോടതിയെ അറിയിക്കണം. യുവതി ഉന്നയിച്ച എല്ലാ ആരോപണത്തേയും കുറിച്ച് കുറ്റമറ്റ രീതിയില്‍ അന്വേഷിക്കണമെന്നും ജസ്റ്റിസ് ശ്രീദേവിയുടെ ഉത്തരവില്‍ പറയുന്നു.
കുറ്റാരോപിതനായ പി.എന്‍ ജയന്തന്റെ ഇടപാടുകളെ കുറിച്ചും ബാങ്ക് ഇടപാടുകള്‍, വാഹനങ്ങള്‍ എന്നിവയെ കുറിച്ചും അന്വേഷിക്കണമെന്നും കോടതി അന്വേഷണ ഉദ്യോഗസ്ഥരോട് ആവശ്യപ്പെട്ടു.
അന്വേഷണം ശരിയായ ദിശയിലല്ലെന്നും കേസ് അട്ടിമറിക്കാന്‍ സാധ്യതയുണ്ടെന്നും ചൂണ്ടിക്കാട്ടിയാണ് യുവതി കോടതിയെ സമീപിച്ചത്. കേസ് അന്വേഷണം കോടതി നിരീക്ഷണത്തില്‍ വേണമെന്നും ഹരജിയില്‍ ആവശ്യപ്പെട്ടിരുന്നു. സര്‍ക്കാരിന് വേണ്ടി അസിസ്റ്റന്റ് പബ്ലിക് പ്രോസിക്യൂട്ടര്‍ കെ. മനോജ് കുമാര്‍ ഹാജരായി.