കോഴിക്കോട്: അമ്മ വാഴ്‌കെ.. മക്കളെ വിട്ട് അമ്മയ്ക്ക് പോക മുടിയാത്... അവരെ ഇനി കടവുള്‍ കാപ്പാത്തും... തമിഴ്‌നാടിന്‍ പുണ്യം അമ്മ, വാഴ്‌കെ! ഏഴൈയിന്‍ തോഴി അമ്മ, വാഴ്‌കെ!.. ഇടറിയ ശബ്ദത്തില്‍ വേലു സ്വാമി പറഞ്ഞു തീര്‍ന്നപ്പോഴേക്കും അദ്ദേഹത്തിന്റെ കൈയിലിരുന്ന ജയലളിതയുടെ ഫോട്ടോ കണ്ണീരില്‍ കുതിര്‍ന്നിരുന്നു. വേലു സ്വാമിയുടെ അതേ അവസ്ഥയിലായിരുന്നു അദ്ദേഹത്തോടൊപ്പമുള്ള തമിഴരെല്ലാം. ജലപാനമില്ലാതെ അമ്മയ്ക്കായി പ്രാര്‍ഥനയില്‍ മുഴുകിയിരിക്കുകയാണവര്‍. അമ്മ പോയ വേദനയ്‌ക്കൊപ്പം അവരെ അവസാനമായി ഒരു നോക്കു കാണാന്‍ കഴിയാത്തതിന്റെ സങ്കടവും എല്ലാവരുടെയും മുഖത്തും വാക്കുകളിലും പ്രകടമായിരുന്നു.
ഓരോരുത്തര്‍ക്കും ജയലളിതയെക്കുറിച്ച് പറയാനുള്ളത് ഓരോ അനുഭവങ്ങള്‍. മക്കളെ പഠിപ്പിക്കാന്‍ നിവൃത്തിയില്ലാതെ വലഞ്ഞപ്പോള്‍ സഹായ ഹസ്തവുമായെത്തി മകളെ പഠിപ്പിച്ച് അവളുടെ കല്യാണവും നടത്തിത്തന്ന അവരെക്കുറിച്ച് പറയാന്‍ പോലുമാകാതെ മുനിയാണ്ടി വിതുമ്പി. ഭാര്യ വിജയമല്ലിയും ഒപ്പം തേങ്ങി. ഓരോരുത്തരും അവരവരുടെ ദുഃഖം മറയ്ക്കാന്‍ പാടുപെട്ടു. തിങ്കളാഴ്ച കോഴിക്കോട്ടെ തമിഴ് സമൂഹത്തിന് ഉറക്കമില്ലാത്ത രാത്രിയായിരുന്നു. പ്രാര്‍ഥനകള്‍ വിഫലമാക്കി ജയലളിത യാത്രയായതോടെ അവരുടെ മനസും തമിഴകത്തേക്കായിരുന്നു.
ഭൂരിഭാഗം പേരും കുടുംബത്തോടൊപ്പം രാത്രി തന്നെ സ്വദേശമായ ചെന്നൈയിലേക്ക് പോയി. പോകാന്‍ കഴിയാത്തവര്‍ വീട്ടിലെ ജയലളിതയുടെ ഫോട്ടോയ്ക്കരികിലിരുന്ന് കണ്ണീര്‍ വാര്‍ത്തു, അമ്മയുടെ ആത്മശാന്തിക്കായി മനമുരുകി പ്രാര്‍ഥിച്ചു.
പുരുഷന്മാര്‍ ഭൂരിഭാഗവും ജയലളിതയെ അവസാനമായി ഒരു നോക്കു കാണാന്‍ തമിഴ്‌നാട്ടിലേക്ക് പോയപ്പോള്‍ സ്ത്രീകള്‍ക്കും പ്രായമായവര്‍ക്കും അതിനു സാധിച്ചില്ല. ഈ നിമിഷത്തിലാണ് കേരളത്തില്‍ വന്നതോര്‍ത്ത് പലരും പ്രയാസപ്പെട്ടത്. നാട്ടിലേക്കു പോകാന്‍ പണമില്ലാത്തതും അവരെ വലച്ചു. മലയാളി സുഹൃത്തുക്കളോട് ചില്ലറ കടം വാങ്ങിയാണ് പലരും നാട്ടിലേക്ക് തിരിച്ചത്.