കുറ്റ്യാടി: പരസഹായമില്ലാതെ ചലിക്കാന്‍ കഴിയാത്ത ബൈജുവിന് പഞ്ചായത്ത് നല്‍കിയ ചക്ര കസേരയില്‍ ഇനി സ്വയം ചലിക്കാം. കഴിഞ്ഞ ഭിന്നശേഷി ദിനത്തിലാണ് പഞ്ചായത്ത് പ്രസിഡന്റ് സി.എന്‍ ബാലകൃഷ്ണന്‍ നേരിട്ടെത്തി ബൈജുവിന് ചക്ര കസേര സമ്മാനിച്ചത്. കുറ്റ്യാടി പഞ്ചായത്തിലെ കൂരാറ ബൈജുവിനാണ് പഞ്ചായത്ത് ചക്ര കസേരനല്‍കിയത്.
ചലനശേഷി കുറഞ്ഞ സ്വന്തം ജീവിതത്തെ ബൈജു തോല്‍പ്പിക്കുന്നത് ചിത്രങ്ങള്‍ വരച്ചാണ്.ജീവസുറ്റ നിരവധി ചിത്രങ്ങളാണ് ഈ ഇരുപത്തിയേഴുകാരന്‍ വരച്ചത്.സ്വന്തമെന്നുപറയാന്‍ ഒരുവീടോ, പരസഹായമില്ലാതെ ഒന്നനങ്ങാനോ ബൈജുവിന് കഴിയില്ല. ചിത്രകലയില്‍ തല്‍പരനായ ബൈജു സ്വന്തം പരിമിതികളെ അവഗണിച്ചാണ് ചിത്ര രചനയില്‍ ഏര്‍പ്പെടുന്നത്. കളര്‍പെന്‍സിലും,ജലച്ചായവും ഉപയോഗിച്ചാണ് ചിത്രങ്ങള്‍ വരക്കുന്നത്. ചിത്ര രചനയില്‍ ശാസ്ത്രീയ പരിശീലനമൊന്നും ബൈജു നേടിയിട്ടില്ല.
അച്ഛന്‍ നേരത്തെ മരിച്ചു. അമ്മ സരോജിനിക്ക് കിട്ടുന്ന വരുമാനമാണ് കുടുംബത്തിന്റെ താങ്ങ്. സ്വന്തമായി വീടില്ലാത്ത ഇവര്‍ കഴിയുന്നത് അച്ഛന്റെ സഹോദരിയുടെ കൂരാറയിലെ വീട്ടിലാണ്. സ്വന്തമായൊരു വീടെന്ന സ്വപ്നം യാഥാര്‍ഥ്യമാകാന്‍ പഞ്ചായത്തിന്റെയും സുമനസുകളുടെയും കാരുണ്യ സ്പര്‍ശം തുണയാവുമെന്ന പ്രതീക്ഷയിലാണ് ഈകുടുംബം.