സുല്‍ത്താന്‍ ബത്തേരി: കാരുണ്യ തണലേകി വിദ്യാര്‍ഥികള്‍ മാതൃകയായി. സെന്റ് മേരീസ് കോളജ് ഹയര്‍ സെക്കന്‍ഡറി സ്‌കൂള്‍ എന്‍.എസ്.എസ് വിദ്യാര്‍ഥികളാണ് നിര്‍ധനരായ സ്വന്തമായി വീടോ സ്ഥലമോ ഇല്ലാത്ത അമ്മക്കും മകള്‍ക്കും തണലായി മാറിയത്. വിധവയും ബുദ്ധിവൈകല്യവുമുള്ള ഏക മകളുടെ അമ്മയായ വത്സക്കും മകള്‍ സോണിയക്കും ഉപജീവന മാര്‍ഗമായി പെട്ടിക്കട നിര്‍മിച്ച് അതിലേക്കാവശ്യമായ സാമഗ്രികള്‍ നല്‍കിയാണ് സമൂഹത്തിന് മാതൃകയായി മാറിയത്. വിദ്യാര്‍ഥികള്‍ കൂപ്പണ്‍ മുഖേന കണ്ടെത്തിയ 50,000 രൂപ ഉപയോഗിച്ചാണ് 'തണല്‍' ജീവകാരുണ്യ പദ്ധതി നടപ്പാക്കിയത്.
എന്‍.എസ്.എസ് സംസ്ഥാന പ്രോഗ്രാം കോ- ഓഡിനേറ്റര്‍ എ സുബൈര്‍കുട്ടി പെട്ടിക്കടയുടെ താക്കോല്‍ ദാനം നിര്‍വഹിച്ചു. ജില്ലാ കോ- ഓഡിനേറ്റര്‍ എം.ജെ ജോസഫ് ആദ്യ വില്‍പന നിര്‍വഹിച്ചു. പി.ടി.എ പ്രസിഡന്റ് കെ.ജെ. ജോണി അധ്യക്ഷനായി.
സെന്റ് മേരീസ് കോളജ് പ്രിന്‍സിപ്പല്‍ ഡോ. ഷേബ എം. ജോസഫ്, സ്‌കൂള്‍ പ്രിന്‍സിപ്പല്‍ കെ.ജി. ജോസ്, എച്ച്എം ഷീബ പി. ഐസക് സംസാരിച്ചു.
ക്ലസ്റ്റര്‍ കോ- ഓഡിനേറ്റര്‍ പ്രദീപ്, എന്‍.എസ്.എസ് പ്രോഗ്രാം ഓഫിസര്‍ സി.വി സ്മിത, പോള്‍ വര്‍ഗീസ്, ബെന്നി വെട്ടിക്കല്‍, ബേസില്‍ ജോസഫ്, സിന്റ യോഹന്നാന്‍ എന്നിവര്‍ നേതൃത്വം നല്‍കി.