കൊച്ചി: മരിക്കാത്ത ഭൂമിക്ക് ആരെങ്കിലും ചരമഗീതം എഴുതുമോ?. സംശയം മറ്റാര്‍ക്കുമല്ല, കവി കൂടിയായ മന്ത്രി ജി.സുധാകരനാണ്. 'ഭൂമിക്കൊരു ചരമഗീതം ' മഹാനായ കവി എഴുതിയിട്ടുണ്ട്. അദ്ദേഹം മരിച്ചു. പക്ഷേ ഭൂമി മരിച്ചില്ല. ഭൂമിക്ക് ചരമഗീതം എഴുതിയത് എന്തിനെന്ന് ഇന്നും തനിക്ക് മനസിലാകുന്നില്ല- ജി. സുധാകരന്‍ പറഞ്ഞു.എറണാകുളം എസ്.ആര്‍.വി സ്‌കൂളില്‍ നാഷനല്‍ സര്‍വിസ് സ്‌കീമിന്റെ യൂനിറ്റ് ഉദ്ഘാടന വേളയിലാണ് മണ്‍മറഞ്ഞ വിഖ്യാതകവി ഒ.എന്‍.വി കുറുപ്പിന്റെ കവിതയെ മന്ത്രി വിമര്‍ശിച്ചത്.

കവിതയെഴുതി ഭൂമിയെ കൊല്ലരുതെന്ന് പറഞ്ഞ മന്ത്രി,നമ്മള്‍ തന്നെയാണ് ഭൂമിയെ നശിപ്പിക്കുന്നതെന്നും അതിനാല്‍ നമ്മളെ നന്നാക്കാനായിരിക്കണം കവിത എഴുതേണ്ടതെന്ന് ഓര്‍മിപ്പിക്കാനും മറന്നില്ല. ഇടക്കാലത്ത് സമൂഹ മാധ്യമങ്ങളില്‍ തരംഗമായ 'ഇനി വരുന്നൊരു തലമുറയ്ക്ക് ഇവിടെവാസം സാധ്യമോ'എന്ന വരികളെയും മന്ത്രി വെറുതെ വിട്ടില്ല. ഇങ്ങനെയൊക്കെ ആര് എഴുതിയാലും ചോദ്യം ചെയ്യപ്പെടണമെന്നായിരുന്നു മന്ത്രിയുടെ വാദം.

മരങ്ങളും മറ്റും വെട്ടി ഭൂമിയെ നശിപ്പിക്കാതെ ഇവിടെ വാസം സാധ്യമാക്കുകയാണ് വേണ്ടത്. അതിജീവനത്തിന് കുട്ടികളെ പഠിപ്പിക്കണമെന്നും അദ്ദേഹം ഓര്‍മിപ്പിച്ചു. തെരുവുനായ്ക്കളെ കൊല്ലുന്നതിന് എതിരുനില്‍ക്കുന്ന മേനകാഗാന്ധിക്കെതിരേയും മന്ത്രി പ്രസംഗത്തിനിടെ കത്തിക്കയറി. ആക്രമിക്കുന്ന തെരുവുനായ്ക്കളെ കൊല്ലുകതന്നെ വേണം. മേനകാഗാന്ധിയല്ല ആരുപറഞ്ഞാലും തെരുവുനായ്ക്കളെ കൊല്ലണം.

ഇത്തരം നടപടികളിലേര്‍പ്പെട്ട് മേനകാഗാന്ധി അവരുടെ ഭര്‍ത്താവിന്റെ പേര് കൂടി കളയുകയാണെന്നും ജി. സുധാകരന്‍ പറഞ്ഞു. ഹൈബി ഈഡന്‍ എം.എല്‍.എ ചടങ്ങില്‍ അധ്യക്ഷനായി. മേയര്‍ സൗമിനു ജെയിന്‍ മുഖ്യപ്രഭാഷണം നടത്തി.