കോഴിക്കോട്: ഗാന്ധിവധം ആര്‍.എസ്.എസിനും സംഘ ശക്തികള്‍ക്കും ഗുണം ചെയ്‌തെന്നു ചരിത്രകാരന്‍ ഡോ. എം.ജി.എസ് നാരായണന്‍. 'ഗാന്ധിവധം: അവഗണിക്കപ്പെട്ട നാള്‍വഴികള്‍' പുസ്തക പ്രകാശന ചടങ്ങില്‍ മുഖ്യപ്രഭാഷണം നടത്തുകയായിരുന്നു അദ്ദേഹം.
ഗാന്ധിവധം നെഹ്‌റുവിനാണു ഗുണം ചെയ്തതെന്ന പുസ്തകത്തിലെ പരാമര്‍ശം തീര്‍ത്തും വേദനാജനകമാണെന്നും വധത്തിനു പിന്നിലെ ശക്തികളെ കുറിച്ചുള്ള കാര്യം പകല്‍വെളിച്ചം പോലെ വ്യക്തമല്ലെന്നും അദ്ദേഹം കൂട്ടിച്ചേര്‍ത്തു. ഗാന്ധിവധം ചരിത്രത്തില്‍ വലിയ വഴിത്തിരിവുകളുണ്ടാക്കിയിട്ടുണ്ടെന്നും ഗാന്ധി മഹാത്മാവാണെന്ന കാര്യം വൈകിയെങ്കിലും ആര്‍.എസ്.എസ് അംഗീകരിച്ചതിനു തെളിവാണു പുസ്തകമെന്നും എം.ജി.എസ് പറഞ്ഞു.
കുരുക്ഷേത്ര ബുക്‌സ് പ്രസിദ്ധീകരിച്ച പുസ്തകം ഷാബു പ്രസാദാണു രചിച്ചത്. അളകാപുരിയില്‍ നടന്ന ചടങ്ങില്‍ അഡ്വ. പി.എസ് ശ്രീധരന്‍പിള്ള ഡോ. എന്‍.ആര്‍ മധുവിനു നല്‍കി പുസ്തകം പ്രകാശനം ചെയ്തു. ഇ.എന്‍ നന്ദകുമാര്‍ അധ്യക്ഷനായി. ഡോ. കെ.എം പ്രിയദര്‍ശന്‍ലാല്‍, കാവാലം അനില്‍, കൃഷ്ണ വാരിയത്ത്, ശ്രീഹരി സംസാരിച്ചു.