കെയ്‌റോ: ഭീഷണികള്‍ക്കിടെ ഐ.എസ് നേതാവ് ആദില്‍ ഹബാറയെ ഈജിപ്ത് തൂക്കിക്കൊന്നു. അന്തിമ ദയാഹരജിയും കോടതി തള്ളിയതിനെ തുടര്‍ന്ന് ഇന്നലെ രാവിലെയാണ് 40കാരനായ ആദിലിനെ തൂക്കിലേറ്റിയത്.
ദയാഹരജി കോടതി തള്ളിയതിനുപിറകെ ഐ.എസ് തീവ്രവാദികള്‍ ഭീഷണിയുമായി രംഗത്തെത്തിയിരുന്നു. വധശിക്ഷ നടപ്പാക്കിയാല്‍ വന്‍ വിലകൊടുക്കേണ്ടിവരുമെന്ന് ഇവര്‍ അബ്ദുല്‍ ഫത്താഹ് സീസിക്ക് മുന്നറിയിപ്പും നല്‍കി. ശൈഖ് ആദില്‍ ഹബാരയെ കൊലപ്പെടുത്തിയാല്‍ രാജ്യവ്യാപകമായി ജിഹാദ് പ്രളയം പൊട്ടിപ്പുറപ്പെടുമെന്നും അത് താങ്കളുടെ സൈന്യത്തിനും സ്ഥാപനങ്ങള്‍ക്കും നാശത്തിലേക്കുള്ള വാതില്‍ തുറക്കുമെന്നും ഒരു ഐ.എസ് അനുകൂല ടെലഗ്രാം സന്ദേശത്തില്‍ പറയുന്നു.
വടക്കന്‍ സിനായില്‍ 2013 ഓഗസ്റ്റില്‍ 25 സൈനികരെ കൊലപ്പെടുത്തിയതിനാണു വധശിക്ഷ നടപ്പാക്കിയത്. 2014ലാണ് ജീവപര്യന്തം തടവുശിക്ഷ വിധിച്ചത്.
ജനാധിപത്യപരമായി തെരഞ്ഞെടുക്കപ്പെട്ട മുന്‍ പ്രസിഡന്റ് മുഹമ്മദ് മുര്‍സിയെ അട്ടിമറിയിലൂടെ പുറത്താക്കിയതിനുപിറകെ ബ്രദര്‍ഹുഡിനെതിരേ നീക്കം ശക്തമാക്കിയിരുന്ന സീസി വടക്കന്‍ സിനായില്‍ വന്‍ തിരിച്ചടി നേരിട്ടിരുന്നു. ഐ.എസിന്റെ പ്രാദേശിക ഘടകമായ സിനായി പ്രൊവിന്‍സായിരുന്നു പ്രധാന വെല്ലുവിളി.