ജിദ്ദ:വ്യാജ എന്‍ജിനീയറിംങ് സര്‍ട്ടിഫിക്കറ്റ് ഹാജരാക്കിയ മലയാളികളടക്കം ഇരുപത്തി മൂന്ന് ഇന്ത്യക്കാരെ സഊദിയില്‍ നിന്നും നാടുകടത്തി. സഊദി കൗണ്‍സില്‍ ഓഫ് എന്‍ജിനീയേഴ്‌സിന്റെ നിര്‍ദേശപ്രകാരം പിഴചുമത്തിയാണ് നടപടി സ്വീകരിച്ചത്. വിദേശ തൊഴിലാളികളുടെ യോഗ്യതാ സര്‍ട്ടിഫിക്കറ്റുകള്‍ വ്യവസായ മന്ത്രാലയം സൂക്ഷ്മ പരിശോധനക്ക് വിധേയമാക്കാന്‍ തുടങ്ങിയതോടെ ഈ മേഖലയിലുള്ള നിരവധി പേര്‍ക്ക് ജോലി നഷ്ടമായിട്ടുണ്ട്.

സഊദി കൗണ്‍സില്‍ ഓഫ് എന്‍ജിനീയേഴ്‌സ് പുറത്തുവിട്ട വിവരങ്ങള്‍ പ്രകാരം ആറ് മാസങ്ങളില്‍ നടന്ന പരിശോധനയില്‍ 140 വ്യാജ എന്‍ജിനീയറിംങ് സര്‍ട്ടിഫിക്കറ്റുകളാണ്  കണ്ടെത്തിയത്. ഇതില്‍ 23 എണ്ണം ഇന്ത്യാക്കാരുടേതാണ്. ഭൂരിപക്ഷവും വന്‍കിട വ്യവസായ സ്ഥാപനങ്ങളില്‍ ജോലി ചെയ്യുന്ന തൊഴിലാളികളുടേതും. വ്യവസായ മന്ത്രാലയവും ഈ മേഖലയില്‍ ജോലി ചെയ്യുന്നവരുടെ സര്‍ട്ടിഫിക്കറ്റുകള്‍ പരിശോധനക്ക് വിധേയമാക്കി വ്യാജമെന്ന് കണ്ടെത്തിയവരെ നാടുകടത്തുകയാണ്.
വ്യാജ അറ്റസ്റ്റേഷന്‍ നടത്തിയതിന്റെ പേരിലും പലര്‍ക്കും ജോലി നഷ്ടമായിട്ടുണ്ട്. ഇതില്‍ ഭൂരിഭാഗവും ഹൈദരാബാദ്, പൂനെ, ചെന്നൈ, ബംഗ്ലൂരു എന്നിവിടങ്ങളിലെ സ്ഥാപനങ്ങളില്‍ പഠിച്ചവരാണ്. വ്യാജ സര്‍ട്ടിഫിക്കറ്റുമായി പിടിക്കപ്പെടുന്നവര്‍ക്കെതിരേ ക്രിമിനല്‍ കുറ്റം ചുമത്തി വിചാരണ ചെയ്യണമെന്ന് ഇതിനകം കൗണ്‍സില്‍ ഓഫ് എന്‍ജിനീയേഴ്‌സ് സര്‍ക്കാരിന് ശുപാര്‍ശ നല്‍കിയിട്ടുണ്ട്.

ഏതു ജോലിക്കാണോ വരുന്നത്, അതിനുള്ള യോഗ്യതാ പരീക്ഷ നടപ്പാക്കണം എന്നും ശൂറാ കൗണ്‍സില്‍ നേരത്തെ ആവശ്യപ്പെട്ടിട്ടുണ്ട്. വ്യാജ പ്രവൃത്തി പരിചയ സര്‍ട്ടിഫിക്കറ്റ് ഹാജരാക്കുന്നവര്‍ക്കെതിരേയും കടുത്ത ശിക്ഷാ നടപടി സ്വീകരിക്കണമെന്ന് കൗണ്‍സില്‍ ഓഫ് ചേംമ്പേഴ്‌സ് തൊഴില്‍ മന്ത്രാലയത്തോട് ആവശ്യപ്പെട്ടിട്ടുണ്ട്.
അതിനിടെ വിദേശികളായ എന്‍ജിനീയര്‍മാരേയും ടെക്‌നീഷ്യന്മാരേയും തിരിച്ചറിയല്‍ രേഖയുമായി ബന്ധിപ്പിക്കാന്‍ ആഭ്യന്തര മന്ത്രി മുഹമ്മദ് ബിന്‍ നായിഫ് രാജകുമാര്‍ കഴിഞ്ഞ ദിവസം പ്രത്യേക നിര്‍ദേശം നല്‍കി.