തിരുവനന്തപുരം: പട്ടം സെന്റ് മേരീസ് സ്‌കൂളില്‍ പഠിക്കുന്ന നെടുമങ്ങാട് സ്വദേശികളായ വിദ്യാര്‍ഥികള്‍ക്ക് പാളയംവഴി സ്‌കൂളില്‍ എത്തുന്നതിനും തിരികെ പോകുന്നതിനും സൗകര്യപ്രദമായ രീതിയില്‍ കണ്‍സഷന്‍ കാര്‍ഡ് അനുവദിക്കണമെന്ന് സംസ്ഥാന മനുഷ്യാവകാശ കമ്മിഷന്‍ ഉത്തരവ്. കെ.എസ്.ആര്‍.റ്റി.സി എം.ഡി ഉത്തരവ് ലഭിച്ച് രണ്ടാഴ്ചയ്ക്കകം നടപടിയെടുക്കണമെന്ന് കമ്മിഷന്‍ ആക്റ്റിങ് ചെയര്‍പേഴ്‌സണ്‍ പി. മോഹനദാസ് നിര്‍ദേശം നല്‍കി.
നെടുമങ്ങാട് പനയമുട്ടം സ്വദേശിനി ലക്ഷ്മി എ.ജെ നായര്‍ സമര്‍പ്പിച്ച പരാതിയിലാണ് നടപടി. പരാതിക്കാരിയുടെ മക്കള്‍ പട്ടം സെന്റ് മേരീസ് സ്‌കൂളിലാണ് പഠിക്കുന്നത്. ബസ് കണ്‍സഷന് വേണ്ടി നെടുമങ്ങാട് ഡിപ്പോയെ സമീപിച്ചപ്പോള്‍ 37 കിലോമീറ്റര്‍ യാത്രക്ക് കണ്‍സഷന്‍ നല്‍കാനാവില്ലെന്ന് പറഞ്ഞു. കമ്മീഷന്‍ വിശദീകരണം ആവശ്യപ്പെട്ടപ്പോഴും വീട് മുതല്‍ പഠിക്കുന്ന സ്ഥാപനം വരെ ഏറ്റവും കുറഞ്ഞ ദൂരത്തിലാണ് കണ്‍സഷന്‍ നല്‍കുന്നതെന്ന് കോര്‍പ്പറേഷന്‍ വിശദീകരിച്ചു. പരാതിക്കാരിയുടെ താമസസ്ഥലമായ പനയമുട്ടത്ത് നിന്നും പട്ടം സെന്റ് മേരീസിലേക്ക് ദൂരം 30 കിലോമീറ്ററാണെന്നും എന്നാല്‍ പാളയം വഴി 37 കിലോമീറ്ററാണെന്നും വിശദീകരണത്തില്‍ പറയുന്നു. സൗകര്യപ്രദമായ രീതിയില്‍ യാത്ര ചെയ്യാന്‍ കഴിയുന്ന വിധം കണ്‍സഷന്‍ നല്‍കാതിരിക്കുന്നത് വിദ്യാര്‍ഥികളോടുള്ള അനീതിയാണെന്ന് കമ്മിഷന്‍ ഉത്തരവില്‍ സൂചിപ്പിക്കുന്നു.