പെരുമ്പാവൂര്‍: ക്രിസ്മസ് - പുതുവത്സരാഘോഷങ്ങളോടനുബന്ധിച്ച് കുന്നത്തുനാട് എക്‌സൈസ് സര്‍ക്കിളിന്റെ കീഴില്‍ നടത്തിയ പരിശോധനയില്‍ കഞ്ചാവ് വില്‍പന നടത്തിയ തമിഴ്‌നാട് സ്വദേശികളടക്കം മൂന്ന് പേര്‍ പിടിയില്‍.
തമിഴ്‌നാട് കൃഷ്ണപുരം സ്വദേശി ജഗനാഥന്‍, വണ്ടപ്പിള്ളി സ്വദേശി ചക്കയ്യന്‍, പെരുമ്പാവൂര്‍ പനിച്ചയം സ്വദേശി മുതുവാശ്ശേരി വീട്ടില്‍ സത്താര്‍ എന്നിവരെയാണ് പെരുമ്പാവൂര്‍ എക്‌സൈസ് സംഘം പിടികൂടിയത്. 200 പൊതികളിലാക്കി സൂക്ഷിച്ചിരുന്ന കാല്‍ കിലോ കഞ്ചാവ് പ്രതികളില്‍ നിന്നും പിടിച്ചെടുത്തു. ഇത്തരം പൊതികള്‍ 300 മുതല്‍ 500 രൂപ വരെ വില ഈടാക്കി വില്‍പന നടത്തുന്നതാണ് പ്രതികളുടെ രീതിയെന്ന് എക്‌സൈസ് പറഞ്ഞു.
സ്‌കൂള്‍ - കോളജ് വിദ്യാര്‍ഥികളും അന്യസംസ്ഥാന തൊഴിലാളികളും കഞ്ചാവ് അടക്കമുള്ള ലഹരി വസ്തുക്കള്‍ ഉപയോഗിക്കുന്നുണ്ടെന്ന പെരുമ്പാവൂര്‍ - കുന്നത്തുനാട് എം.എല്‍.എമാരുടെ അധ്യക്ഷതയിലുള്ള ജനകീയ കമ്മറ്റിയില്‍ ആക്ഷേപം ഉയര്‍ന്നതിനെ തുടര്‍ന്ന് നടത്തിയ പരിശോധനയിലാണ് പ്രതികള്‍ കുടുങ്ങിയത്.
പെരുമ്പാവൂര്‍ കോടതിയില്‍ ഹാജറാക്കിയ പ്രതികളെ റിമാന്റ് ചെയ്തു.
കുന്നത്തുനാട് എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ബാബു വര്‍ഗീസിന്റെ നേതൃത്വത്തില്‍ ഇന്‍സ്‌പെക്ടര്‍ റ്റി.കെ ഗോപി, എ.ഇ.ഐമാരായ കെ.എ മാര്‍ട്ടിന്‍, കെ.കെ സുബ്രഹ്മണ്യന്‍, പ്രിവന്റീവ് ഓഫീസര്‍ പി.കെ ബാലൃഷ്ണന്‍, സി.പി.ഒമാരായ റ്റി.വി ജോണ്‍സണ്‍, എം.എ അസൈനാര്‍, വി.എ ഷമീര്‍, അജി അഗസ്റ്റിന്‍, കുഞ്ഞുമുഹമ്മദ്, ഗോപാലകൃഷ്ണന്‍, ഡ്രൈവര്‍മാരായ മനോജ്, സക്കീര്‍ ഹുസൈന്‍ എന്നിവരടങ്ങുന്ന സംഘമാണ് റെയ്ഡ് നടത്തിയത്.