മുംബൈ: മഹാരാഷ്ട്രയിലെ ഗോണ്ഡിയയില്‍ ഹോട്ടലിലുണ്ടായ തീപിടിത്തത്തില്‍ ഏഴുപേര്‍ മരിച്ചു. മരിച്ചവരില്‍ രണ്ടുപേര്‍ സ്ത്രീകളാണ്.
ഹോട്ടലില്‍ റൂമെടുത്തവരാണ് മരിച്ചവരെന്ന് പൊലിസ് അറിയിച്ചു.
ഗൊരേലാല്‍ ചൗകിലെ ബിന്‍ഡാല്‍ ഹോട്ടലില്‍ തീപടര്‍ന്നത്. ഉറങ്ങിക്കിടന്നവരാണ് മരിച്ച ആറുപേര്‍. തീ ആളിപ്പടര്‍ന്നതോടെ രക്ഷക്കായി രണ്ടാം നിലയില്‍ നിന്ന് പുറത്തേക്ക് ചാടിയ ഒരാളാണ് മരിച്ച ഏഴാമന്‍. 15 അഗ്നിശമന യൂണിറ്റുകള്‍ എത്തി മണിക്കുറുകള്‍ നീണ്ട ശ്രമത്തിനൊടുവിലാണ് തീ നിയന്ത്രണ വിധേയമാക്കാന്‍ കഴിഞ്ഞതെന്ന് ഗോഡ്ചിറോളി പൊലിസ് ഐ.ജി പറഞ്ഞു.
പുലര്‍ച്ചെ 3.30ഓടെയാണ് ഹോട്ടലില്‍ തീപിടിത്തമുണ്ടായത്. തീപിടിത്തമുണ്ടായപ്പോള്‍ ഹോട്ടലില്‍ 15 പേര്‍ താമസക്കാരായുണ്ടായിരുന്നു.
തീ ആളിപ്പടര്‍ന്നതോടെയാണ് താമസക്കാരില്‍ ഒരാള്‍ രണ്ടാം നിലയില്‍ നിന്നും പുറത്തേക്ക് ചാടിയത്. ഇയാളെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. മരിച്ചവരെല്ലാവരേയും തിരിച്ചറിയാനായിട്ടില്ലെന്ന് പൊലിസ് അറിയിച്ചു.