ജിദ്ദ : അതിവേഗ ട്രെയിന്‍ ഹറമൈൻ  ഓടിത്തുടങ്ങാന്‍ ഇനി പൂര്‍ത്തിയാകാനുളളത് പത്ത് കിലോമീറ്റര്‍ പാത മാത്രമെന്ന് പദ്ധതിയുടെ മേല്‍നോട്ടച്ചുമതലയുളള ബസാം ഗുലാം. അല്‍ഇസ്ഖാന്‍ മുതല്‍ ഏഴ് കിലോമീറ്ററും ജിദ്ദയിലെ അല്‍ഹസറത് ജില്ലയില്‍ മൂന്ന് കിലോമീറ്ററുമാണ് പൂര്‍ത്തിയാക്കാനുളളതെന്ന് അദ്ദേഹം മക്ക ചേമ്പര്‍ ഓഫ് കൊമേഴ്‌സ് ആന്‍ഡ് ഇന്‍ഡസ്ട്രിയുടെ യോഗത്തില്‍ വ്യക്തമാക്കി.

പദ്ധതിയുടെ ആദ്യഘട്ടത്തില്‍ 1.2 ബില്യന്‍ യാത്രക്കാരെ എത്തിക്കുമെന്നാണ് പ്രതീക്ഷ. പ്രതിവര്‍ഷം 100 മില്യന്‍ ജനങ്ങള്‍ യാത്ര ചെയ്യുമെന്നാണ് പ്രതീക്ഷ. പദ്ധതിയുടെ തുടക്കത്തില്‍ മണിക്കൂറില്‍ 11400 മുതല്‍ 12400 വരെ ആളുകള്‍ക്ക് യാത്ര ചെയ്യാമെന്നും പ്രതീക്ഷിക്കുന്നു.

പദ്ധതി പൂര്‍ണമാകുന്നതോടെ മണിക്കൂറില്‍ 19100 പേര്‍ക്ക് ജിദ്ദയ്ക്കും മക്കയ്ക്കുമിടയില്‍ യാത്ര ചെയ്യാനാകും. മക്കയ്ക്കും മദീനയ്ക്കുമിടയില്‍ 3800 യാത്രക്കാരെയും റബീഗിനും മദീനയ്ക്കുമിടയില്‍ 8000 പേരെയും പ്രതീക്ഷിക്കുന്നു. ഇരുപത് ലക്ഷം തീര്‍ത്ഥാടകരെയും പ്രതിവര്‍ഷം ട്രെയിന്‍ വഹിക്കും. 138 പാലങ്ങളില്‍ 127 ഉം നിര്‍മിച്ച് കഴിഞ്ഞു. മഴവെള്ളം ഒഴുകാനായി 845 ക്രോസിംഗുകളും പൂര്‍ത്തിയാക്കി.

ജിദ്ദ-മക്ക യാത്ര 21 മിനിറ്റാക്കി കുറയ്ക്കാനും ഇതിലൂടെ കഴിയും. മക്ക-റാബിഗ് യാത്ര ഒരു മണിക്കൂറും, മക്ക-മദീന യാത്ര രണ്ട് മണിക്കൂറുമാകും. സുരക്ഷാ കാരണങ്ങളാല്‍ ട്രെയിനിന്റെ വേഗത മുന്നൂറ് കിലോമീറ്ററില്‍ മുകളില്‍ കൂടില്ലെന്നു അദ്ദേഹം അറിയിച്ചു .