പേര്യ: സ്വന്തമായി കെട്ടിടവും സ്ഥലവും ഉണ്ടായിട്ടും പേര്യ ഗവ. ഹൈസ്‌കൂളില്‍ അടിസ്ഥാന സൗകര്യങ്ങള്‍ ഒരുക്കുന്ന കാര്യത്തില്‍ അധികൃതരുടെ ഭാഗത്തുനിന്നും നടപടികള്‍ ഉണ്ടാകണമെന്ന് ആവശ്യം ഉയരുന്നു. 2013ലാണ് സ്വന്തം കെട്ടിടത്തില്‍ ക്ലാസുകള്‍ ആരംഭിച്ചത്. 320ഓളം കുട്ടികളാണ് ഇവിടെ പഠനം നടത്തുന്നത്. ഗ്രൗണ്ടും പരീശീലകരുമൊന്നും ഇല്ലാത്തതിനാല്‍ തന്നെ വിദ്യാര്‍ഥികള്‍ക്ക് കായിക മേഖലയില്‍ കാര്യമായ നേട്ടമുണ്ടാക്കാന്‍ കഴിയുന്നില്ല. സ്‌കൂളിന് സ്വന്തമായി ഒന്നര ഏക്കറോളം ഭൂമിയുണ്ടെങ്കിലും അടിസ്ഥാന സൗകര്യങ്ങള്‍ നന്നേ കുറവാണ്. വിദ്യാര്‍ഥികള്‍ക്ക് അസംബ്ലി ചേരാന്‍ പോലും സ്ഥലമില്ലാത്ത സാഹചര്യമാണ്. കഞ്ഞിപ്പുരയുടെ കാര്യവും ഏറെ പരിതാപകരമാണ്. മരത്തൂണുകളില്‍ കെട്ടി പൊക്കി തകര ഷീറ്റില്‍ തീര്‍ത്ത ഷെഡില്‍ വെറും നിലത്താണ് ഭക്ഷണം പാകം ചെയ്യുന്നത്. സ്‌കുളിന്റെ മുന്‍വശം ചെങ്കുത്തായ കുഴിയാണ് ഇതിനാല്‍തന്നെ വിദ്യാര്‍ഥികള്‍ക്ക് അപകടം സംഭവിക്കുന്നതും പതിവാണ്. നല്ലൊരു മൈതാനമില്ലാത്തതിനാല്‍ തന്നെ കായിക മത്സരങ്ങള്‍ ഒന്നും നടത്താന്‍ കഴിയാത്ത സ്ഥിതിയാണ്. ചെങ്കുത്തായ മുന്‍വശം കെട്ടിപ്പൊക്കി മണ്ണ് നിറച്ചാല്‍ അത്യാവശത്തിന് മൈതാനമായി ഉപയോഗിക്കാന്‍ കഴിയും കൂടാതെ അപകടങ്ങളും ഒരുപരിധി വരെ ഒഴിവാകും. സ്‌കൂളിലേക്കുള്ള റോഡിന്റെ പകുതി ഭാഗം കോണ്‍ക്രീറ്റ് ചെയ്തിട്ടുണ്ട്. ബാക്കിഭാഗം കാല്‍നടയാത്ര പോലും ചെയ്യാന്‍ കഴിയാത്ത നിലയിലാണ്. സ്‌കൂളിന്റെ അടിസ്ഥാന വികസനങ്ങള്‍ക്കായി ജനപ്രതിനിധികള്‍ അടക്കമുള്ളവരുടെ അടിയന്തിര ശ്രദ്ധ പതിയണമെന്നാണ് പി.ടി.എയുടെയും അധ്യാപകരുടെയും ആവശ്യം.