അമ്പലപ്പുഴ: പിതാവിനൊപ്പം സ്‌കൂട്ടറില്‍ പോയ 12 വയസ്സുകാരി ലോറിയിടിച്ചു മരിച്ചു. അമ്പലപ്പുഴ തെക്കു പഞ്ചായത്ത് കോമന നന്ദനം വീട്ടില്‍ സതീശന്‍ ദീപ്തി ദമ്പതികളുടെ മകള്‍ അപര്‍ണ്ണ (12) ആണ് മരിച്ചത്.

വെള്ളിയാഴ്ച വൈകിട്ട് അഞ്ചോടെ ദേശീയ പാതയില്‍ കളര്‍കോട് ബ്ലോക്കിനു സമീപമായിരുന്നു അപകടം. ആലപ്പുഴ ഭാഗത്തേക്കു പോകുകയായിരുന്ന ഇവരുടെ സ്‌കൂട്ടറില്‍ തടികയറ്റി വന്ന ലോറി ഇടിക്കുകയായിരുന്നു.

ഇടിയുടെ ആഘാതത്തില്‍ തെറിച്ചുവീണ അപര്‍ണ്ണ സംഭവസ്ഥലത്തുവെച്ചു തന്നെ മരിച്ചു. അമ്പലപ്പുഴ മറിയാ മോണ്ടിസോറി സ്‌കൂള്‍ വിദ്യാര്‍ഥിനിയാണ് മരിച്ച അപര്‍ണ്ണ. മൃതദേഹം ആലപ്പുഴ മെഡിക്കല്‍ കോളജ് ആശുപത്രി മോര്‍ച്ചറിയില്‍.