ലണ്ടന്‍: മുന്‍ ഇംഗ്ലണ്ട് ഫുട്‌ബോള്‍ ടീം കോച്ച് സാം അല്ലാര്‍ഡൈസ് ഇംഗ്ലീഷ് പ്രീമിയര്‍ ലീഗ് ടീം ക്രിസ്റ്റല്‍ പാലസിന്റെ പരിശീലകനാകും. ടീമിന്റെ മോശം പ്രകടനത്തെ തുടര്‍ന്നു പുറത്താക്കിയ അലന്‍ പര്‍ഡ്യുവിനു പകരമാണ് അല്ലാര്‍ഡൈസിന്റെ നിയമനം.
നാളെ വാട്‌ഫോര്‍ഡുമായുള്ള മത്സരത്തില്‍ അല്ലാര്‍ഡൈസിന്റെ പരിശീലനത്തിലാണ് ടീമിറങ്ങുന്നത്. 17 ലീഗ് മത്സരങ്ങളില്‍ നാലു വിജയങ്ങള്‍ മാത്രമാണ് ക്രിസ്റ്റല്‍ പാലസിനുള്ളത്. ഇതാണ് പര്‍ഡ്യുവിന്റെ സ്ഥാനം തെറിപ്പിച്ചത്. നേരത്തെ ഇംഗ്ലണ്ടിനെ ഒറ്റ മത്സരത്തില്‍ മാത്രം പരിശീലിപ്പിച്ച അല്ലാര്‍ഡൈസിനെ ഫുട്‌ബോള്‍ അസോസിയേഷന്‍ പുറത്താക്കുകയായിരുന്നു.