കാലിക്കടവ്: ചെണ്ടമേളങ്ങള്‍ക്കൊപ്പം കൈനിറയെ മിഠായികളുമായി ക്രിസ്മസ് അപ്പൂപ്പനെത്തിയപ്പോള്‍ കുട്ടികളില്‍ കൗതുകവും ആഹ്ലാദവും. ചന്തേര ഇസ്സത്തുല്‍ ഇസ്‌ലാം എ.എല്‍.പി സ്‌കൂളിലാണ് അപ്പൂപ്പനൊപ്പം കുട്ടികള്‍ ക്രിസ്മസ് ആഘോഷിച്ചത്.
മൂന്നാം തരത്തിലെ ആദിക് ബാബുവാണ് ക്രിസ്മസ് അപ്പൂപ്പനായി വേഷമിട്ടത്. സ്‌കൂള്‍ പി.ടി.എ പ്രസിഡന്റ് എം.ബാബു കേക്ക് മുറിച്ച് ക്രിസ്മസ് ആഘോഷം ഉദ്ഘാടനം ചെയ്തു. കെ.ആര്‍ ഹേമലത അധ്യക്ഷയായി.
കുട്ടികളുടെ കലാപരിപാടികളും അരങ്ങേറി. പിലിക്കോട് ഗവ.യു.പി സ്‌കൂളിലും വൈവിധ്യമാര്‍ന്ന പരിപാടികളോടെ ക്രിസ്മസ് ആഘോഷം നടന്നു. പുല്‍ക്കൂട് ഒരുക്കിയും കേക്ക് മുറിച്ചുമൊക്കെയായിരുന്നു ആഘോഷം.
കാസര്‍കോട്: പുല്‍ക്കൂടൊരുക്കിയും ക്രിസ്മസിനെ വരവേറ്റും ബാലഭവന്‍ സ്‌കൂളില്‍ ആഘോഷം. പി.ടി.എ കമ്മിറ്റിയുടെ നേതൃത്വത്തിലാണ് പരിപാടിയൊരുക്കിയത്. സ്‌കൂള്‍ പ്രിന്‍സിപ്പല്‍ കെ ലീലാവതി ഉദ്ഘാടനം ചെയ്തു. പി.ടി.എ പ്രസിഡന്റ് ശശിധര പണ്ഡിറ്റ് അധ്യക്ഷനായി.
കേക്ക് മുറിച്ചും മധുര പലഹാരങ്ങള്‍ വിതരണം ചെയ്തും നടന്ന ആഘോഷത്തില്‍ മലയാളം അധ്യാപിക കെ.വി അനിത ക്രിസ്മസ് സന്ദേശം നല്‍കി.
ഏഴാം ക്ലാസ് വിദ്യാര്‍ഥി ആര്‍ രാഹുല്‍ സാന്താക്ലോസ് ആയി വേഷമിട്ടു.
അധ്യാപകരായ കെ.വി അനിത, കെ ജയന്തി, കെ അനിത സംബന്ധിച്ചു.