ചേര്‍ത്തല: നാഷണല്‍ സര്‍വീസ് സ്‌കീമിന്റെ മനസ്സുനന്നാവട്ടെ എന്നുതുടങ്ങുന്ന പ്രാര്‍ത്ഥനാ ഗാനം എല്ലാ സ്‌കൂളുകളിലും രാവിലെയുള്ള പ്രാര്‍ത്ഥനാഗാനമായി ഉള്‍പ്പെടുത്തണമെന്ന് അഡ്വ.എ.എം ആരിഫ് എംഎല്‍എ പറഞ്ഞു. മുട്ടം ഹോളിഫാമിലി ഹയര്‍സെക്കന്ററി സ്‌കൂളിന്റെ സപ്തദിന സഹവാസക്യാമ്പ് ഉണര്‍വ്-2016 ചേര്‍ത്തല ബിഷപ് മൂര്‍ വിദ്യാപീഠം സ്‌കൂളില്‍ സ്‌കൂള്‍ ഓഡിറ്റോറിയത്തില്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. മതങ്ങളെക്കാള്‍ മനുഷ്യനെ സ്‌നേഹിക്കുവാന്‍ മനസ്സുണ്ടാകണമെന്ന വരികള്‍ കേള്‍ക്കുമ്പോള്‍ തന്നെ മനസ്സിന് ഉണര്‍വേകുമെന്നും ആരിഫ് പറഞ്ഞു. മുട്ടം ഹോളിഫാമിലി ഹയര്‍സെക്കന്ററി സ്‌കൂളിലെ പിടിഎ പ്രസിഡന്റ് ബിനു.കെ കുഞ്ഞപ്പന്‍ അധ്യക്ഷത വഹിച്ചു. വാര്‍ഡ് മെമ്പര്‍ എന്‍.ശശിധരന്‍, അരുണ്‍.എം.എസ്, ആന്റണി, ബിജു ജോസഫ്, മാസ്റ്റര്‍ അരവിന്ദ് എന്നിവര്‍ സംസാരിച്ചു.