ബേപ്പൂര്‍: അനാഥ കുടുംബത്തിനു സ്‌നേഹഭവനമൊരുക്കാനായി ഒരു ദിവസത്തെ അധ്വാനം സമര്‍പ്പിച്ചു വിദ്യാര്‍ഥികള്‍. ബേപ്പൂര്‍ ഗവ. ഹയര്‍സെക്കന്‍ഡറി സ്‌കൂള്‍ സ്റ്റുഡന്റ്‌സ് പൊലിസ് കേഡറ്റുകളും എന്‍.എസ്.എസ് വളണ്ടിയര്‍മാരും ചേര്‍ന്ന് പാമ്പ് പിടിത്തക്കാരന്‍ പരേതനായ സജീവന്റെ കുടുംബത്തിനു വേണ്ടി നിര്‍മിക്കുന്ന സ്‌നേഹഭവനത്തിന്റെ തറ മണിക്കൂറുകള്‍ക്കകം മണ്ണിട്ടുനികത്തുകയായിരുന്നു.
പാമ്പുകളുടെ ഉറ്റതോഴനായി ജീവിച്ച് ഒടുവില്‍ മൂര്‍ഖന്റെ കടിയേറ്റാണ് സജീവന്‍ മരിച്ചത്. ഇതോടെ അനാഥമായ കുടുംബത്തിന് ബേപ്പൂര്‍ ഗവ. ഹയര്‍സെക്കന്‍ഡറി സ്‌കൂള്‍ സ്റ്റുഡന്റ്‌സ് പൊലിസ് യൂനിറ്റ് പി.ടി.എയുമായി സഹകരിച്ചാണ് സ്‌നേഹഭവനം എന്ന പേരില്‍ വീട് നിര്‍മിച്ചുനല്‍കുന്നത്. ഇക്കഴിഞ്ഞ നവംബര്‍ പത്തിനാണു വീടിനു തറക്കല്ലിട്ടത്. രണ്ട് യൂനിറ്റുകളിലായി എസ്.പി.സിയുടെ 88 അംഗങ്ങളും സ്‌കൂളിലെ എന്‍.എസ്.എസ് യൂനിറ്റിലെ 50 പേരും ചേര്‍ന്നാണു വീടിന്റെ തറ മണ്ണിട്ടു നികത്തിയത്. തറയില്‍ മണ്ണിട്ടശേഷം വെള്ളമൊഴിച്ചു ബലപ്പെടുത്തിയാണു പണി അവസാനിപ്പിച്ചത്.
ഇന്നലെ രാവിലെ പത്തിന് ആരംഭിച്ച ജോലി 12ഓടെ അവസാനിച്ചു. അധ്യാപകരും പി.ടി.എ ഭാരവാഹികളും വിദ്യാര്‍ഥികള്‍ക്ക് കൂട്ടായി എത്തിയിരുന്നു. സ്റ്റുഡന്റ്‌സ് പൊലിസ് കാഡറ്റ് സി.പി.ഒ ജോബി അല്‍ബര്‍ട്ട്, എന്‍.പി നിഷാദ്, ലീഡര്‍മാരായ ഹാഷിദ് കബീര്‍, ദേവിക, എന്‍.എസ്.എസ് ലീഡര്‍മാരായ അക്ഷയ് കെ, ഷാമിലി റിന്‍ഷ, പി.ടി.എ ഭാരവാഹികളായ കെ.വി മുസ്തഫ, മുരളി ബേപ്പൂര്‍, ഐ.ടി അബ്ദുറഹ്മാന്‍, ടി. സജീവന്‍ എന്നിവരാണു നിര്‍മാണ പ്രവൃത്തിക്കു നേതൃത്വം നല്‍കിയത്.