കൊളത്തൂര്‍: പഴയ കെ.എസ്.ഇ.ബി സെക്ഷന്‍ ഓഫിസ് പരിസരത്തെ റോഡരികില്‍ സ്ഥിതി ചെയ്യുന്ന വൈദ്യുതി പോസ്റ്റ് സമീപവാസികള്‍ക്ക് ഭീഷണിയാകുന്നു. കൊളത്തൂര്‍ കുറുപ്പത്താല്‍ ടൗണില്‍ ഫെഡറല്‍ ബാങ്കിനു സമീപത്താണ് താഴെ ഭാഗം ദ്രവിച്ച നിലയില്‍ ഇരുമ്പ് കൊണ്ട് നിര്‍മിച്ച വൈദ്യുതിക്കാലുള്ളത്.
ഈ വൈദ്യുതിപോസ്റ്റില്‍ നിന്നാണ് ഫെഡറല്‍ ബാങ്കടക്കമുള്ള നാലുകെട്ടിടങ്ങളിലേക്കും എട്ടോളം വീടുകളിലേക്കും കൊളത്തൂര്‍ സെക്ഷന്‍ പരിധിയിലേക്ക് വരുന്ന 220 കെ.വി യും 110 കെവിയുമെല്ലാം കടന്നു പോകുന്നത്. നാലു വശങ്ങളിലേക്കും വലിച്ചുകെട്ടിയെന്നതു പോലെ ലൈനുകള്‍ പാസ്സ് ചെയ്യുന്നതിനാലാണ് താഴെ വീഴാതെ ഇപ്പോഴും വൈദ്യുത കാല്‍ നിലനില്‍ക്കുന്നത്. താഴെ ഭാഗം ദ്രവിച്ചതിനാല്‍ ഏതുനിമിഷവും അടര്‍ന്നുവീഴാറായ നിലയിലാണ്. റോഡരികില്‍ അപകടാവസ്ഥയില്‍ സ്ഥിതി ചെയ്യുന്ന ഈ വൈദ്യുതക്കാല്‍ മാറ്റി സ്ഥാപിച്ചില്ലെങ്കില്‍ വന്‍ അപകടങ്ങള്‍ക്ക് കാരണമായേക്കും.