സുള്ള്യ: കോളജില്‍ ക്രൂരമായ റാഗിങിന്റെ പേരില്‍ 10 മലയാളി മെഡിക്കല്‍ വിദ്യാര്‍ഥികളെ സുള്ള്യ പൊലിസ് അറസ്റ്റ് ചെയ്തു.
പാലക്കാട് വടക്കുംതറ സ്വദേശി കൃഷ്ണകുമാര്‍(24), പാലക്കാട് ചിലവര സ്വദേശി എ.പി കണ്ണന്‍(22), തിരുവനന്തപുരം വെഞ്ഞാറമൂട് സ്വദേശി ഫര്‍ഹാന്‍ മുഹമ്മദ്(21), ആലപ്പുഴ വയലാര്‍ സ്വദേശി സഞ്ജയ് കൃഷ്ണന്‍ (23), കോട്ടയം പാപ്പിഞ്ചേരി സ്വദേശി കെ.ടി വാസിം സുബൈര്‍ (26), കൊല്ലം ശാസ്താംകോട്ട സ്വദേശി നിബിന്‍ റഹീം (21), മലപ്പുറം കണ്ണമംഗലം സ്വദേശി നീരജ് രവി പ്രസാദ് (23), തിരുവനന്തപുരം കൊളത്തൂര്‍ സ്വദേശി അബല്‍ റോയ്(21), കോട്ടയം തീപ്പൊയി ജെറ്റിന്‍ ജോസ്(21), പത്തനം തിട്ട അടൂര്‍ സ്വദേശി അമല്‍ രാജ് (23) എന്നിവരാണ് അറസ്റ്റിലായത്.
കഴിഞ്ഞ മാസം 28 ന് സുള്ള്യ കെ.വി.ജി മെഡിക്കല്‍ കോളജില്‍ നടന്ന റാഗിങുമായി ബന്ധപ്പെട്ടാണ് അറസ്റ്റ്. രണ്ടാം വര്‍ഷ മെഡിക്കല്‍ വിദ്യാര്‍ഥിയായ നിഷാന്തിന്റെ (20) പരാതിയിലാണ് കേസ് രജിസ്റ്റര്‍ ചെയ്തിരിക്കുന്നത്.
നിഷാന്ത് സുഹൃത്തുക്കളായ ആശിഷ്, റിഷാദ്, ശരത്, മനു, അരുണ്‍, പ്രഭിന്‍, മനാര്‍ എന്നിവരെ റാഗ് ചെയ്തതായാണ് പരാതി.
സീനിയര്‍ വിദ്യാര്‍ഥികളായ ഞങ്ങളെ ബഹുമാനിക്കണമെന്നും ഞങ്ങള്‍ പറയുന്നതുപോലെ ചെയ്യണം അല്ലെങ്കില്‍ കേരളത്തിലേക്കുള്ള യാത്രക്കിടയില്‍ വധിക്കുമെന്നും ഭീഷണി ഉയര്‍ത്തിയാണ് ഹോസ്റ്റലില്‍ വിദ്യാര്‍ഥികളെ റാഗ് ചെയ്തത്. ജനുവരി രണ്ടിനാണ് വിദ്യാര്‍ഥികള്‍ കോളജ് പ്രന്‍സിപ്പലിന് പരാതി നല്‍കിയത്.
കഴിഞ്ഞ ദിവസം വൈകീട്ട് പൊലിസെത്തി ഇവരെ അറസ്റ്റ് ചെയ്തു. കോടതിയില്‍ ഹാജാരാക്കിയ പ്രതികളെ ജാമ്യത്തില്‍ വിട്ടു.