മണ്ണാര്‍ക്കാട്: സ്‌കൂള്‍ കുട്ടികള്‍ തന്നെ അവതാരകരും, റിപ്പോര്‍ട്ടറുമായുളള വാര്‍ത്തകളുമായി സ്‌കൂള്‍ വിഷന്‍ ചാനലില്‍ സംപ്രേഷണം തുടങ്ങി. കോട്ടോപ്പാടം പഞ്ചായത്തിലെ പുറ്റാനിക്കാട് വി.എ.എല്‍.പി സ്‌കൂളിലാണ് ആധുനിക സജ്ജീകരണങ്ങളുമായി സ്‌കൂള്‍ വിഷന്‍ ചാനല്‍ പ്രവര്‍ത്തനം തുടങ്ങിയത്. റെക്കോര്‍ഡ് ചെയ്ത വാര്‍ത്തകള്‍ സ്‌കൂള്‍ ഫേസ് ബുക്കിലും, യൂട്യൂബിലുമാണ് സംപ്രേക്ഷണം ചെയ്യും. ഇതിനായി ആധുനിക സംവിധാനമുള്‍പ്പെടെയുളള ചെറിയ സ്റ്റുഡിയോയും സ്‌കൂളിലൊരിക്കിയിട്ടുണ്ട്. കഴിഞ്ഞ ക്രിസ്മസ് ദിനത്തില്‍ തയ്യാറാക്കിയ പ്രഥമ വാര്‍ത്താ പ്രക്ഷേപണത്തിന് മുവ്വായിരത്തിലധികം പേരാണ് കണ്ടത്. ഇതില്‍ നിന്ന് പ്രചോദനം ഉള്‍കൊണ്ട് ആഴ്ചയിലൊരിക്കല്‍ വാര്‍ത്താ പ്രക്ഷേപണം നടത്താനാണ് തീരുമാനം. സംജിത്.കെ.ദാസ് വാര്‍ത്താവതാരകനായും, കെ. ഷിബി റിപ്പോര്‍ട്ടറുമായി തയ്യാറാക്കിയ വാര്‍ത്താവതരണമാണ് ആദ്യം പ്രക്ഷേപണം ചെയ്തത്. ആഴ്ചയിലൊരിക്കല്‍ സംപ്രേക്ഷണം ചെയ്യുന്ന പരിപാടിയില്‍ അവതാരകര്‍ മാറി മാറി വരും.