സിദ്ധാപുരം(കുടക്): കാപ്പിതോട്ടത്തില്‍ തമ്പടിച്ച കാട്ടാനകള്‍ തമ്മില്‍ ഏറ്റുമുട്ടി. ഗുരുതരമായി പരുക്കേറ്റ കൊമ്പന്‍ ചരിഞ്ഞു. സിദ്ധാപുരം ഗോണിക്കുപ്പ റൂട്ടിലെ ബജഗൊല്ലിക്കടുത്തു വുഡ് ലാന്റ് കാപ്പിതോട്ടത്തിലാണ് സംഭവം. ഇന്നലെ രാവിലെയാണ് കാപ്പിതോട്ടത്തില്‍ രണ്ടുകാട്ടാനകള്‍ തമ്മിലിടഞ്ഞത്. മണിക്കൂറുകളോളം നീണ്ടു നിന്ന പോരാട്ടത്തില്‍ കഴുത്തിന്റെ പിന്‍ഭാഗത്തും തലയ്ക്കും ഗുരുതരമായി പരുക്കേറ്റ കൊമ്പന്‍ അവശനായി കിടക്കുകയും ഒടുവില്‍ ചരിയുകയുമായിരുന്നു.
ജനം ബഹളംവച്ചതോടെ അക്രമിയായ ആന ഓടിമറഞ്ഞു. വിവരമറിഞ്ഞു വനപാലകരും റവന്യൂ ഉദ്യോഗസ്ഥരും സ്ഥലത്തെത്തി.
കഴിഞ്ഞ കുറെ ദിവസങ്ങളായി സിദ്ധാപുരം, മംഗല, ചെട്ടള്ളി ഭാഗങ്ങളില്‍ കാട്ടാനയുടെ ശല്യം വ്യാപകമായിട്ടുണ്ട്. ബജഗൊല്ലി തോട്ടത്തില്‍ ട്രക്കില്‍കാപ്പിയുമായി പോവുകയായിരുന്ന കര്‍ഷകനെ വാഹനത്തില്‍ നിന്നും വലിച്ചിട്ട് ആന ചവുട്ടിക്കൊന്നിരുന്നു.