കരുനാഗപ്പള്ളി: പുത്തന്‍തെരുവ് ദേശീയപാതയ്ക്ക് സമീപം ടാങ്കറും ടോറസ് ലോറിയും കൂട്ടിയിടിച്ചു. ആര്‍ക്കും പരുക്കില്ലാതെ രക്ഷപ്പെട്ടു. ഇന്നലെ ഉച്ചക്ക് 2.30ന് ആയിരുന്നു അപകടം. ഓച്ചിറ ഭാഗത്തേക്ക് പോവുകയായിരുന്ന ടോറസ് ലോറിയുടെ മുന്നിലുണ്ടായിരുന്ന മാരുതി കാര്‍ പെട്ടെന്ന് ബ്രേക്ക് ചവിട്ടിയതിനെ തുടര്‍ന്ന് കാറിന്റെ പിറകില്‍ ഉണ്ടായിരുന്ന ടോറസ് ലോറി ബ്രേക്ക് ചവിട്ടുകയും തൊട്ട് പിറകേഎറണാകുളത്തേക്ക് പോവുകയായിരുന്ന ഐ ഒ സി യുടെ ടാങ്കര്‍ ലോറി ടോറസ് ലോറിയുടെ പിറകിലേക്ക് ഇടിച്ച് കയറുകയുമായിരുന്നു.
ടാങ്കര്‍ ലോറിയുടെ മുന്‍ഭാഗം തകര്‍ന്ന് എഞ്ചിന്‍ ഓയില്‍ പുറത്തേക്ക് ഒഴുകി. ഇത് മൂലം അരമണിക്കൂറോളം ഗതാഗതം സ്തംഭിച്ചു. തുടര്‍ന്ന് വിവരമറിഞ്ഞ് കരുനാഗപ്പള്ളിയില്‍ നിന്നും പൊലിസെത്തി ഗതാഗതം പുനഃസ്ഥാപിച്ചു.