ദമസ്‌കസ്: സൈനിക കേന്ദ്രത്തിന് സമീപമുണ്ടായ ചാവേര്‍ സ്‌ഫോടനത്തില്‍ എട്ടുപേര്‍ കൊല്ലപ്പെട്ടു. കേണല്‍ ഉള്‍പ്പെടെ നാലു സൈനികരും മരിച്ചവരില്‍ ഉള്‍പ്പെടും. ദമസ്‌കസ് ജില്ലയിലെ കഫര്‍ സോസ നഗരസഭക്ക് സമീപത്തായിരുന്നു ചാവേറായി എത്തിയ ആള്‍ സ്‌ഫോടനം നടത്തിയത്. ദേഹത്ത് ബോംബുമായി എത്തിയ ചാവേര്‍ കഫര്‍ സോസയിലെ സ്‌പോര്‍ട്‌സ് ക്ലബ്ബിന് സമീപത്തെത്തിയപ്പോള്‍ ബെല്‍റ്റ് ബോംബ് പൊട്ടിക്കുകയായിരുന്നുവെന്ന് സിറിയന്‍ ഒബ്‌സര്‍വേറ്ററി ഫോര്‍ ഹ്യൂമണ്‍ റൈറ്റ്‌സ് വ്യക്തമാക്കി. മന്ത്രിമാരും മുതിര്‍ന്ന സൈനിക ഉദ്യോഗസ്ഥരുമെല്ലാം താമസിക്കുന്ന അതീവ സുരക്ഷാ മേഖലയിലാണ് ബോംബ് സ്‌ഫോടനം നടന്നത്.
സിറിയന്‍ രഹസ്യാന്വേഷണ വിഭാഗത്തിന്റെ ആസ്ഥാനം പ്രവര്‍ത്തിക്കുന്നതും ഇവിടെയാണെങ്കിലും സ്‌ഫോടനം അല്‍പം മാറിയായിരുന്നുവെന്ന് സിറിയന്‍ സര്‍ക്കാരിന്റെ ഔദ്യോഗിക വാര്‍ത്താ ഏജന്‍സിയായ സന വ്യക്തമാക്കി. ഈ മേഖലയില്‍ ഇത്തരത്തില്‍ ഒരു സ്‌ഫോടനം നടന്നത് ബഷര്‍ അല്‍ അസദ് സര്‍ക്കാരിനെ ഞെട്ടിച്ചിരിക്കയാണ്. ദമസ്‌കസില്‍ നിരവധി സ്‌ഫോടനങ്ങള്‍ വിമതര്‍ സംഘടിപ്പിച്ചിട്ടുണ്ടെങ്കിലും അവയെല്ലാം അവരുടെ ശക്തികേന്ദ്രങ്ങളിലും പരിസരങ്ങളിലുമായിരുന്നു. ഡിസംബര്‍ 16ന് മിഡാന്‍ ജില്ലയില്‍ ചാവേറായി എത്തിയ ഏഴു വയസുകാരി പൊട്ടിത്തെറിച്ച് മൂന്ന് പൊലിസ് ഓഫിസര്‍മാര്‍ മരിച്ചിരുന്നു. 2011ല്‍ കഫ്ര സോസയിലുണ്ടായ ഇരട്ട സ്‌ഫോടനത്തില്‍ 40 പേര്‍ കൊല്ലപ്പെട്ടിരുന്നു.