കോട്ടക്കല്‍: ഇന്നലെ കോഴിച്ചെനയിലുണ്ടായ വാഹനാപകടത്തില്‍ ഒഴിവായത് വന്‍ ദുരന്തം. ലോറി നിയന്ത്രണംവിട്ട് പതിനാലു വാഹനങ്ങളില്‍ ഇടിച്ചുണ്ടായ അപകടത്തില്‍ ഒരാള്‍ മരിക്കുകയും ആറു പേര്‍ക്കു പരുക്കേല്‍ക്കുകയും ചെയ്തിരുന്നു.
പാലച്ചിറമാട് കയറ്റം കഴിഞ്ഞ ശേഷമാണ് ലോറി നിയന്ത്രണംവിട്ട് അപകടത്തില്‍പെടുന്നത്. മേലേ കോഴിച്ചെന മുതല്‍ പൂക്കിപ്പറമ്പുവരെ കുത്തനെയുള്ള ഇറക്കമായതിനാല്‍ വാഹനം നിയന്ത്രിക്കാന്‍ പറ്റാതെയുമായിരുന്നു.
നിയന്ത്രണംവിട്ട ലോറി തൊട്ടുമുന്നിലുണ്ടായിരുന്ന കാറിനാണ് ആദ്യം ഇടിക്കുന്നത്. പിന്നീട് എതിരേ വന്ന വാഹനങ്ങളിലും താഴെ കോഴിച്ചെന അങ്ങാടിയില്‍ ടാക്‌സി പാര്‍ക്കിങ് ഏരിയയില്‍ നിര്‍ത്തിയിട്ടിരുന്ന വാഹനങ്ങളിലും ഇടിക്കുകയായിരുന്നു. ഇതിനു പുറമേ കടകളിലേക്കു സാധനങ്ങള്‍ വാങ്ങാനെത്തിയവരുടെ വാഹനങ്ങളും അപകടത്തില്‍പെട്ടു. സാധാരണ ഈ ഭാഗത്തു യാത്രക്കാരുടെ തിരക്കനുഭവപ്പെടാറുണ്ട്.
പെരുമണ്ണ, ചെട്ടിയാംകിണര്‍ ഭാഗത്തുനിന്നുള്ളവര്‍ കോട്ടക്കല്‍, കക്കാട് ഭാഗങ്ങളിലേക്കു പോകാനായി ബസ് കാത്തിരിക്കുന്നത് ഇവിടെയാണ്. രണ്ടാം ശനിയാഴ്ചയായതിനാല്‍ ബസ് സ്റ്റോപ്പില്‍ ആളുകള്‍ കുറവായിരുന്നു. കൂടാതെ, സ്‌കൂള്‍ പ്രവൃത്തിദിവസമല്ലാത്തതിനാല്‍ വിദ്യാര്‍ഥികളടെ തിരക്കില്ലാത്തതും ദുരന്തത്തിന്റെ വ്യാപ്തി കുറച്ചു.
അമിത വേഗതയിലെത്തിയ ലോറി കണ്ട് അങ്ങാടിയിലുള്ളവര്‍ ഓടുകയായിരുന്നു. ബൈക്ക് യാത്രികരായ നാലു പേര്‍ക്കും കാറിലുണ്ടായിരുന്ന സ്ത്രീയടക്കം രണ്ടു പേര്‍ക്കും പരുക്കേറ്റു. സമീപത്തെ കടകളിലുള്ളവരും നാട്ടുകാരും എത്തി അപകടത്തില്‍പെട്ടവരെ ഉടന്‍ ആശുപത്രിയിലെത്തിക്കുകയായിരുന്നു. ദേശീയപാത പാലച്ചിറമാട് മുതല്‍ പൂക്കിപ്പറമ്പുവരെയുള്ള ഒന്നര കിലോമീറ്ററിനുള്ളില്‍ അപകടങ്ങള്‍ നടക്കുന്നതു പതിവാണ്. താഴെ കോഴിച്ചെനയില്‍നിന്ന് നിയന്ത്രണംവിട്ട പ്രണവം ബസ് കത്തിയമര്‍ന്നാണ് വര്‍ഷങ്ങള്‍ക്കു മുന്‍പു പൂക്കിപ്പറമ്പിലുണ്ടായ ദുരന്തത്തില്‍ 44 പേര്‍ മരിച്ചത്.
മേലേ കോഴിച്ചെനയില്‍നിന്ന് കക്കാട് ഭാഗത്തേക്കു പോകുമ്പോള്‍ വിശാലമായ ഒരു കിലോമീറ്റര്‍ നിളത്തിലുള്ള റോഡാണിവിടെ. ഇതിനു പുറമേ ഇറക്കംകൂടി ആയതിനാല്‍ വാഹനങ്ങളുടെ വേഗത വര്‍ധിക്കുകയും ചെയ്യുന്നു. എന്നാല്‍, ഇതു നിയന്ത്രിക്കുതിനു പ്രത്യേക സംവിധാനമോ മുന്നറിയിപ്പ് ബോര്‍ഡുകളോ ഹമ്പോ ഈ ഭാഗത്തില്ല.