ന്യൂയോര്‍ക്ക്: അമേരിക്കന്‍ രഹസ്യാന്വേഷണ ഏജന്‍സി സി.ഐ.എയുടെ ചരിത്രരേഖകള്‍ ഇനി പൊതുജനങ്ങള്‍ക്കും നേരിട്ട് വായിക്കാം. 1,30,00,000 കോടിയോളം പേജുള്ള രഹസ്യ ചരിത്രരേഖകള്‍ കഴിഞ്ഞ ദിവസം സി.ഐ.എ ഓണ്‍ലൈനില്‍ പ്രസിദ്ധീകരിച്ചു.
എന്നാല്‍, പുതുതായി പരസ്യപ്പെടുത്തിയതല്ല ഈ രേഖകളൊന്നും. നേരത്തെ മേരിലാന്‍ഡിലെ കോളജ് പാര്‍ക്കിലുള്ള നാഷനല്‍ ആര്‍ക്കൈവ്‌സിലെ നാല് കംപ്യൂട്ടറുകളില്‍ മാത്രം ഈ രേഖകള്‍ ലഭ്യമായിരുന്നു. വിയറ്റ്‌നാം, കൊറിയന്‍ യുദ്ധം, ശീതയുദ്ധം തുടങ്ങിയവയില്‍ ഏജന്‍സി നടത്തിയ പ്രവര്‍ത്തനങ്ങളിലേക്കു വെളിച്ചം വീശുന്നതാണു രേഖകള്‍.
2017 അവസാനത്തോടെ ഏജന്‍സിയുടെ ചരിത്രരേഖകള്‍ പൊതുജനങ്ങള്‍ക്ക് ഓണ്‍ലൈനായി ലഭ്യമാക്കണമെന്ന് കഴിഞ്ഞ വര്‍ഷം ഒക്ടോബറില്‍ ഏജന്‍സി തീരുമാനിച്ചിരുന്നു. വിവര-സാങ്കേതിക രംഗത്തെ വന്‍ കുതിച്ചുചാട്ടത്തിന്റെ ഭാഗമായാണു പ്രതീക്ഷിച്ചതിനേക്കാളും വേഗത്തില്‍ ലക്ഷ്യം പൂര്‍ത്തീകരിക്കാനായത്.
ഏജന്‍സിയുടെ താല്‍പര്യത്തിലുള്ള കാര്യങ്ങള്‍ മാത്രമല്ല ഏജന്‍സി പ്രസിദ്ധീകരിച്ചതെന്നും അവ പൂര്‍ണചരിത്രമാണെന്നും സി.ഐ.എ വക്താവ് ഹെതര്‍ ഫ്രിറ്റ്‌സ് ഹോര്‍നിയാക് പറഞ്ഞു. നല്ലതും ചീത്തയുമായ കാര്യങ്ങളെല്ലാം രേഖയിലുണ്ടെന്നും അദ്ദേഹം കൂട്ടിച്ചേര്‍ത്തു.