കയ്പമംഗലം: മോഷ്ടാക്കളെ പിടികൂടാന്‍ പൊലിസും യുവാക്കളും ഉറക്കമൊഴിച്ചിരിന്നിട്ടും മതിലകം പൊലിസ് സ്‌റ്റേഷന്‍ പരിധിയില്‍ മോഷണവും മോഷണ ശ്രമവും തകൃതിയായി നടക്കുന്നു. പുതിയകാവ് പാപ്പിനിവട്ടത്ത് കഴിഞ്ഞ ദിവസം മോഷണം നടന്നു. പുതിയകാവ് മുളങ്ങത്ത് വീട്ടില്‍ രതീഷിന്റെ വീട്ടിലാണ് ബുധനാഴ്ച രാത്രിയില്‍ മോഷണം നടന്നത്. പ്രദേശത്ത് വ്യാപകമായി മോഷ്ട്ടാക്കളെ പറ്റിയുള്ള ഭീതിനിറഞ്ഞ വാര്‍ത്തകള്‍ വന്നതിനെ തുടര്‍ന്ന് വിവിധ പ്രദേശങ്ങളില്‍ കരുതലോടെ പൊലിസും യുവാക്കളും കാവലിരിക്കുന്ന സമയത്താണ് മോഷണം എന്നുള്ളത് ആശങ്കയുളവാക്കുന്നതാണ്. രജീഷിന്റെ വീട്ടിലെ ബാത്ത്‌റൂമിലെ വെന്റിലേറ്റര്‍ തകര്‍ത്താണ് ബെഡ്‌റൂമില്‍ കയറി മൂന്നര പവന്‍ വരുന്ന മാല കവര്‍ന്നത്. സംഭവത്തില്‍ വീട്ടുകാര്‍ മതിലകം പൊലിസില്‍ പരാതി നല്‍കിയിട്ടുണ്ട്. കഴിഞ്ഞ ഒരു മാസക്കാലമായി മതിലകം പൊലിസ് പരിധിയിലെ ജനങ്ങള്‍ ഭീതിയോടെയാണ് കഴിഞ്ഞു കൂടുന്നത്. കയ്പമംഗലം പഞ്ചായത്തിലെ കൂരിക്കുഴി പ്രദേശത്താണ് ഏറ്റവും കൂടുതല്‍ മോഷണ ശ്രമം നടക്കുന്നത്. കള്ളന്‍മാരെ ഭയന്ന് സ്വസ്ഥമായി അന്തിയുറങ്ങാന്‍ പറ്റാത്ത അവസ്ഥയാണെന്ന് നാട്ടുകാര്‍ പരാതിപ്പെടുന്നു.