കല്‍പ്പറ്റ: സമ്പൂര്‍ണ വൈദ്യുതീകരണ പദ്ധതിയില്‍ ജില്ലയില്‍ ഇതുവരെ ലഭിച്ചത് 13,981 അപേക്ഷകള്‍. സുല്‍ത്താന്‍ ബത്തേരി നിയോജക മണ്ഡലത്തിലാണ് ഏറ്റവും കൂടുതല്‍ അപേക്ഷകരുള്ളത്.
6213 അപേക്ഷകളാണ് വീട് വൈദ്യുതീകരണത്തിന് മണ്ഡലത്തില്‍ നിന്നുള്ള അപേക്ഷ. കല്‍പ്പറ്റ 4364, മാനന്തവാടി 3404 എന്നിങ്ങനെയാണ് മറ്റു മണ്ഡലങ്ങളിലെ അപേക്ഷരുടെ എണ്ണം.
അപേക്ഷകരില്‍ 2856 പേര്‍ക്ക് ഇതിനകം കണക്ഷന്‍ നല്‍കി. ബത്തേരി 1040, കല്‍പ്പറ്റ 818, മാനന്തവാടിയില്‍ 998 എന്നിങ്ങനെയാണ് പദ്ധതി പ്രഖ്യാപനത്തിനു ശേഷം വൈദ്യുതി ലഭിച്ചത്.
അപേക്ഷകരില്‍ 9000 പേര്‍ വീടുകളുടെ വയറിങ് നടത്താത്തവരാണ്. വയറിങ് നടത്തി റിപ്പോര്‍ട്ട് സമര്‍പ്പിക്കുന്ന മുറക്കാണ് കണക്ഷന്‍ നല്‍കുന്നത്. 215209 സിംഗിള്‍ ഫേസും 2479 ത്രീ ഫേസും അടക്കം 2,17,688 ഗാര്‍ഹിക ഗുണഭോക്താക്കളാണ് കെ.എസ്.ഇ.ബിക്ക് ജില്ലയിലുള്ളത്.
സമ്പൂര്‍ണ വൈത്യുതീകരണം എന്ന ലക്ഷ്യം കൈവരിക്കുന്നതിനു 23 കിലോമീറ്റര്‍ 11 കെ.വി ഒ.എച്ച് ലൈനും 20 കിലോമീറ്റര്‍ ലോ ടെന്‍ഷന്‍ ഒ.എച്ച് ത്രീഫേസ് ലൈനും 260 കിലോമീറ്റര്‍ ലോ ടെന്‍ഷന്‍ ഒ.എച്ച് സിംഗിള്‍ ഫേസ് ലൈനും നാല് കിലോമീറ്റര്‍ ഹൈ ടെന്‍ഷന്‍ ഭൂഗര്‍ഭ ലൈനുമാണ് വലിക്കാനുള്ളത്. 17 ട്രാന്‍സ്‌ഫോര്‍മറുകളും സ്ഥാപിക്കണം.
സമ്പൂര്‍ണ വൈദ്യുതീകരണത്തിനു ഫണ്ട് തടസമല്ലെന്ന് കെ.എസ്.ഇ.ബി ഉദ്യോഗസ്ഥര്‍ പറയുന്നു. എം.എല്‍.എമാര്‍ ആസ്തി വികസന നിധിയില്‍ നിന്ന് ഓരോ കോടി രൂപയും പട്ടികവര്‍ഗ വികസന വകുപ്പ് എട്ടരക്കോടി രൂപയും പട്ടികജാതി ക്ഷേമ വകുപ്പ് 67 ലക്ഷം രൂപയും പദ്ധതിക്കായി അനുവദിക്കുന്നുണ്ട്.
ഏകദേശം മൂന്നു കോടി രൂപയാണ് കെ.എസ്.ഇ.ബി സ്വന്തം നിലക്ക് ചെലവഴിക്കേണ്ടത്. അപേക്ഷകര്‍ മുഴുവന്‍ വീടുകള്‍ വയറിങ് നടത്തി റിപ്പോര്‍ട്ട് സമര്‍പ്പിക്കാത്തതും സമ്പൂര്‍ണ വൈദ്യുതീകരണ പ്രഖ്യാപനത്തെ ബാധിക്കുമെന്ന് ബോര്‍ഡ് ഉദ്യോഗസ്ഥര്‍ കരുതുന്നു.