ലിസ്റ്റില്‍ പട്ടിക വര്‍ഗ വകുപ്പ്, റവന്യൂ, പഞ്ചായത്ത്, പൊലിസ് ഉദ്യോഗസ്ഥര്‍
മാനന്തവാടി: മാവോയിസ്റ്റുകളുടെ ഹിറ്റ്‌ലിസ്റ്റില്‍ ഉള്‍പെട്ട സര്‍ക്കാര്‍ ഉദ്യോഗസ്ഥരുടെ വിവരങ്ങള്‍ രഹസ്യാന്വേഷണ വിഭാഗം വയനാട് ജില്ലാ കലക്ടര്‍ക്ക് കൈമാറി.
വയനാട് ജില്ലയിലെ വിവിധ സര്‍ക്കാര്‍ വകുപ്പുകളിലുള്ള 48 ഉദ്യോഗസ്ഥരുടെ വിവരങ്ങളാണ് നല്‍കിയത്.
നിലമ്പൂര്‍ കരുളായി വനമേഖലയില്‍ പൊലിസ് ഏറ്റുമുട്ടലില്‍ കൊല്ലപ്പെട്ട കുപ്പു ദേവരാജ് താമസിച്ചിരുന്ന സ്ഥലത്ത് നിന്ന് ലഭിച്ച പെന്‍ഡ്രൈവിലാണ് വയനാട്ടില്‍ സാധാരണക്കാരെയും ആദിവാസികളെയും ദ്രോഹിക്കുന്ന ഉദ്യോഗസ്ഥര്‍ക്കെതിരേയുള്ള വിവരങ്ങളുള്ളത്.
അഴിമതിക്കാരായ ഉദ്യോഗസ്ഥരെ തട്ടികൊണ്ടുപോകുകയോ വധിക്കുകയോ ചെയ്യുമെന്നും സൂചനയുണ്ടായിരുന്നു. തുടര്‍ന്നാണ് ലിസ്റ്റില്‍ ഉള്‍പെട്ട ഉദ്യോഗസ്ഥര്‍ ആരൊക്കെയെന്ന് കണ്ടെത്താന്‍ രഹസ്യാന്വേഷണ വിഭാഗത്തിന് ചുമതല നല്‍കിയത്.
പൊതുജനങ്ങളില്‍ നിന്ന് വിവരങ്ങള്‍ ശേഖരിച്ചാണ് ഉദ്യോഗസ്ഥരുടെ പട്ടിക തയാറാക്കിയത്. പട്ടിക വര്‍ഗ വകുപ്പ്, റവന്യൂ, പഞ്ചായത്ത്, പൊലിസ് തുടങ്ങിയ വകുപ്പുകളില്‍പ്പെട്ടവരാണ് ഭൂരിഭാഗം ഉദ്യോഗസ്ഥരും. ആശിക്കും ഭൂമി ആദിവാസിക്ക് സ്വന്തം പദ്ധതിയില്‍ അഴിമതി നടത്തിയവര്‍, റിസോര്‍ട്ട്, ക്വാറി, മണല്‍ ലോബികളെ സഹായിച്ചവര്‍, ബ്ലേഡ് മാഫിയക്ക് ഒത്താശ ചെയ്തു കൊടുത്ത പൊലിസ് ഉദ്യോഗസ്ഥര്‍ എന്നിവരെല്ലാം ലിസ്റ്റില്‍ ഉള്‍പ്പെട്ടിട്ടുണ്ട്.
വില്ലേജ് ഓഫിസര്‍, പഞ്ചായത്ത് സെക്രട്ടറി, പഞ്ചായത്ത് ഓവര്‍സിയര്‍മാര്‍, വില്ലേജ് ക്ലാര്‍ക്ക്, ഹെഡ് കോണ്‍സ്റ്റബിള്‍ തുടങ്ങിയവരുടെ ലിസ്റ്റാണ് സമര്‍പ്പിച്ചത്. 48ല്‍ 28 പേര്‍ വലിയ അഴിമതിക്കാരാണെന്നും കണ്ടെത്തിയിട്ടുണ്ട്.
രഹസ്യാന്വേഷണ വിഭാഗം തയാറാക്കിയ ലിസ്റ്റ് ജില്ലാ പൊലിസ് മേധാവിക്ക് സമര്‍പ്പിച്ചു. എസ്.പി ജില്ലാ കലക്ടര്‍ക്ക് കൈമാറുകയായിരുന്നു.
ലിസ്റ്റില്‍ ഉള്‍പ്പെട്ട ഉദ്യോഗസ്ഥരെ സംബന്ധിച്ച വിവരങ്ങള്‍ അതാത് വകുപ്പുകള്‍ക്ക് കൈമാറും. ഇതിന്റെ അടിസ്ഥാനത്തില്‍ വകുപ്പുകള്‍ എടുത്ത നടപടികള്‍ സംബന്ധിച്ച റിപ്പോര്‍ട്ട് ജില്ലാ കലക്ടര്‍ക്ക് സമര്‍പ്പിക്കുമെന്നാണ് സൂചന.