വടക്കാഞ്ചേരി: വികസന പ്രവര്‍ത്തനങ്ങള്‍ക്കു രൂപംനല്‍കുമ്പോള്‍ ജനകീയ പങ്കാളിത്തം ഉറപ്പാക്കണമെന്ന് ചീഫ് സെക്രട്ടറി എസ്.എം വിജയാനന്ദ് പറഞ്ഞു. മാതൃകാപരമായി വികസന പദ്ധതികള്‍ ആവിഷ്‌കരിക്കുന്നതിനായിരിക്കണം മുന്‍ഗണന. താഴേതട്ടിലുള്ള പ്രൊഫഷനലുകളുടെ സേവനം ഉറപ്പാക്കണമെന്നും അദ്ദേഹം പറഞ്ഞു. മണ്ണിനെയും ജലസ്രോതസുകളെയും നവീകരിച്ചും ശുദ്ധീകരിച്ചും ആസൂത്രിതമായ നഗരവികസനം സാധ്യമാക്കുക എന്ന ലക്ഷ്യത്തോടെ വടക്കാഞ്ചേരി നഗരസഭ 20 വകുപ്പുകളെ സംയോജിപ്പിച്ചു നടപ്പാക്കുന്ന 'ഹരിത കേരളം' പദ്ധതിയുടെ സമര്‍പ്പണം നിര്‍വഹിച്ചു സംസാരിക്കുകയായിരുന്നു എസ്.എം വിജയാനന്ദ്.
അനുവദിച്ചു കിട്ടുന്ന തുക മുഴുവന്‍ ചെലവഴിക്കുക എന്നതല്ല യഥാര്‍ഥ വികസനം. കുറഞ്ഞ ചെലവില്‍ നടപ്പാക്കുന്നതിനാണു മുന്‍ഗണന നല്‍കേണ്ടത്. വിദ്യാഭ്യാസത്തിന്റെ കാര്യത്തില്‍ എസ്.സി, എസ്.ടി വിഭാഗങ്ങളും പൊതുവിഭാഗവും തമ്മില്‍ നിലനില്‍ക്കുന്ന വലിയ അന്തരം ഇല്ലാതാക്കാന്‍ കഴിയണം. ത്രിതല പഞ്ചായത്തുകള്‍ സല്‍ഭരണത്തിനും സേവനത്തിനും മുന്‍ഗണന നല്‍കണമെന്നും അദ്ദേഹം പറഞ്ഞു. അത്താണിയിലെ പെരിങ്ങണ്ടൂര്‍ സര്‍വിസ് സഹകരണ ബാങ്ക് ഓഡിറ്റോറിയത്തില്‍ നടന്ന ചടങ്ങില്‍ നഗരസഭാ വൈസ് ചെയര്‍മാന്‍ എം.ആര്‍ അനൂപ്കിഷോര്‍ അധ്യക്ഷനായി.
ജില്ലാ കലക്ടര്‍ എ. കൗശികന്‍ മുഖ്യാതിഥിയായിരുന്നു. വടക്കാഞ്ചേരി ബ്ലോക്ക് പഞ്ചായത്ത് പ്രസിഡന്റ് എസ്. ബസന്ത്‌ലാല്‍, നഗരസഭാ സ്ഥിരംസമിതി അധ്യക്ഷന്മാരായ എം.ആര്‍ സോമനാരായണന്‍, ടി.എന്‍ ലളിത, നഗരസഭാ സെക്രട്ടറി ലിജോ അഗസ്റ്റിന്‍, കൗണ്‍സിലര്‍മാര്‍ സംസാരിച്ചു.