പാനൂര്‍: കടയില്‍ സാധനം ഇറക്കുന്നതിനിടയില്‍ ലോറി ഡ്രൈവറെ സി.ഐ.ടി.യു പ്രവര്‍ത്തകര്‍ മര്‍ദിച്ചതായി പരാതി. സംഭവത്തില്‍ രണ്ടു പേരെ പൊലിസ് അറസ്റ്റുചെയ്തു. കല്ലിക്കണ്ടിയിലെ ഹോം ഫാക്ടറിയില്‍ സാധനം ഇറക്കുന്നതിനിടയിലാണ് മലപ്പുറം പുളിക്കല്‍ സ്വദേശിയായ ഹാരിസി(35) ന് മര്‍ദനമേറ്റത്. ഇന്നലെ വൈകിട്ട് അഞ്ചോടെയായിരുന്നു സംഭവം.
കടയില്‍ സാധനവുമായി വന്ന ലോറിയുടെ ഡ്രൈവറാണ് ഹാരിസ്. സാധനം ഇറക്കാന്‍ ആരുമില്ലാത്തതിനാല്‍ സഹായിക്കുകയായിരുന്നു. സി.ഐ.ടി.യു പ്രവര്‍ത്തകരായ ശ്രീധരന്‍, അമ്മദ് എന്നിവരുടെ നേതൃത്വത്തിലാണ് മര്‍ദിച്ചത്. വിവരമറിഞ്ഞെത്തിയ കൊളവല്ലൂര്‍ എസ്.ഐ ഇ.കെ ഷിജുവും സംഘവും ശ്രീധരനെയും അമ്മദിനെയും അറസ്റ്റ് ചെയ്തു. വധശ്രമത്തിനാണ് ഇരുവര്‍ക്കെതിരേയും കേസെടുത്തത്. പ്രതികളെ ഇന്നു കോടതിയില്‍ ഹാജരാക്കും.