പാറക്കടവ്: ചെക്യാട് പഞ്ചായത്തിന്റെ കുടിവെള്ള വിതരണ സ്രോതസായ ചെറ്റക്കണ്ടി കായലോട്ട് താഴെ പുഴയും വറ്റിവരണ്ടതോടെ പഞ്ചായത്തിലെ ജലവിതരണവും നിലച്ചു. ജല അതോറിറ്റി ബി.എസ്.എഫ് കേന്ദ്രത്തിന് താഴെയുള്ള വളപ്പില്‍ താഴെയിലെ പമ്പ് ഹൗസില്‍ നിന്നും അരീക്കര കുന്നിലെ വാട്ടര്‍ടാങ്കിലേക്ക് വെള്ളമെത്തിച്ചാണ് ആയിരക്കണക്കിന് ഗുണഭോക്താക്കള്‍ക്ക് കുടിവെള്ളമെത്തിച്ചിരുന്നത്.
കൊടും വരള്‍ച്ചയില്‍ പുഴ വറ്റിവരണ്ടതോടെ പമ്പിങ് നിലച്ചു. ഉമ്മത്തൂര്‍ മുതല്‍ പുളിയാവ് വരെയുള്ള വിവിധ വാര്‍ഡുകളില്‍ പൊതുടാപ്പുകളും ഗാര്‍ഹിക കണക്ഷനുകളിലും വെള്ളമെത്തിയിട്ട് മാസങ്ങളായി. പഞ്ചായത്തിലെ ഉമ്മത്തൂര്‍, പുളിയാവ്, കായലോട്ട് താഴെ, കുറുന്തേരി, താനക്കോട്ടൂര്‍, കണ്ടിവാതുക്കല്‍ ഭാഗങ്ങളിലാണ് കുടിവെള്ളക്ഷാമം രൂക്ഷം. കിണറുകള്‍ എണ്‍പത് ശതമാനവും വറ്റിയ നിലയിലാണ്. പലരും വീടുപൂട്ടി ബന്ധുവീടുകളിലേക്ക് താമസം മാറ്റിയിട്ടുണ്ട്. മയ്യഴി പുഴയില്‍ വ്യാപകമായി ഉപ്പുവെള്ളം കയറിയത് പ്രതിസന്ധി രൂക്ഷമാക്കി. ഗ്രാമപഞ്ചായത്തും വിവിധ സാംസ്‌കാരിക സംഘടനകളും ലോറികളില്‍ ടാങ്കിലൂടെ വിതരണം ചെയ്യുന്ന വെള്ളമാണ് ഇപ്പോള്‍ ഏക ആശ്രയം. ഉള്‍ഗ്രാമങ്ങളില്‍ ലോറികള്‍ക്ക് എത്തിപ്പെടാന്‍ പറ്റാത്ത മേഖലകളില്‍ പ്രതിസന്ധി രൂക്ഷമാണ്. ഗ്രാമപഞ്ചായത്ത് മെംബര്‍മാര്‍ മുന്‍കൈയെടുത്ത് ജലവിതരണത്തിന് ശ്രമിക്കുന്നുണ്ടെങ്കിലും ഫണ്ടിന്റെ അപര്യാപ്തത ഈ നീക്കങ്ങള്‍ക്ക് വിഘാതമാവുകയാണ്.