സുല്‍ത്താന്‍ ബത്തേരി: മലബാര്‍ നാച്വറല്‍ ഹിസ്റ്ററി സൊസൈറ്റിയും വനം വകുപ്പും ചേര്‍ന്ന് വയനാട് വന്യജീവി സങ്കേതത്തില്‍ നടത്തുന്ന തുമ്പികളുടെ സര്‍വേ വെള്ളിയാഴ്ച ആരംഭിച്ചു. സുല്‍ത്താന്‍ ബത്തേരി, മുത്തങ്ങ, കുറിച്യാട്, തോല്‍പ്പെട്ടി റേഞ്ചുകളിലായാണ് സര്‍വേ നടത്തുന്നത്. സംസ്ഥാനത്തിന്റെ വിവിധ ഭാഗങ്ങളില്‍ നിന്നുള്ള 48 പേര്‍ 16 ടീമുകളിലായി സര്‍വേയില്‍ പങ്കെടുക്കുന്നുണ്ട്. വനത്തിനുള്ളില്‍ തന്നെ താമസിച്ചാണ് സര്‍വേ നടത്തുന്നത്.
രണ്ടുവര്‍ഷത്തിന് ശേഷമാണ് ഇപ്പോള്‍ സര്‍വേ നടക്കുന്നത്. അന്ന് 69 ഇനം തുമ്പികളെയാണ് കണ്ടെത്താനായത്. സര്‍വേയില്‍ തുമ്പികളുടെ ചിത്രം പകര്‍ത്തുകയാണ് പ്രധാനമായും ചെയ്യുന്നത്. ഈ ചിത്രങ്ങളെ അടിസ്ഥാനപ്പെടുത്തിയായിരിക്കും കൂടുതല്‍ പഠനങ്ങള്‍ നടത്തുക. വയനാട് വന്യജീവി സങ്കേതത്തിലാണ് ഏറ്റവും കൂടുതല്‍ തുമ്പികളെ കാണാന്‍ സാധിക്കുന്നത്. ചതുപ്പുകളുടേയും അരുവികളുടെയും സമീപത്തായി ധാരാളം തുമ്പികളെ കാണാറുണ്ട്. വയനാട് വന്യജീവി സങ്കേതം വൈല്‍ഡ് ലൈഫ് വാര്‍ഡന്‍ പി. ധനേഷ് കുമാര്‍ പരിപാടി ഉദ്ഘാടനം ചെയ്തു. ബത്തേരി ഫോറസ്റ്റ് റെയ്ഞ്ച് ഓഫിസര്‍ കൃഷ്ണദാസ്, ഇ കിരണ്‍, ജാഫര്‍ പാലോട്ട് സംസാരിച്ചു. ഞായറാഴ്ചയാണ് സര്‍വേ സമാപിക്കുന്നത്.